O artista arraiano Xulio Fontes, natural de Forxán, na parroquia de Quintela de Leirado, continúa ampliando a súa intensa actividade expositiva coa presentación da mostra individual “Mulleres”, inaugurada o pasado 5 de xuño na cidade de Lugo e que permanecerá aberta ao público ata o vindeiro 31 de xullo.
A exposición está instalada nun espazo singular: as antigas celas destinadas ás mulleres do histórico cárcere lucense, un escenario que engade unha dimensión especial a unha colección composta por 36 retratos femininos, nos que o autor ofrece diferentes visións da muller a través de múltiples perspectivas, profesións e contextos vitais.
Fontes, que medrou nas abas do Penagache, leva décadas desenvolvendo unha traxectoria artística marcada pola experimentación e a conexión coa natureza. No seu lugar de orixe chegou incluso a crear un singular museo ao aire libre, tras unha primeira intervención artística realizada sobre os postes de cemento do alumeado público, da que aínda se conservan algunhas pegadas e obras catalogadas.
Unha vocación artística desde a infancia
Xa durante a súa etapa escolar destacaba polas súas habilidades para o debuxo, chegando a obter primeiros premios en concursos. Desde entón nunca abandonou a creación plástica, construíndo unha carreira avalada por numerosas exposicións tanto en Galicia como no norte de Portugal.
Nos últimos anos a súa obra puido verse en espazos como o Espazo Dentalnova de Ourense, a Sala Vista Alegre da Bandeira (Silleda), o Museo Ramón María Aller de Lalín ou o Edificio As Redeiras da Universidade de Vigo, situado no Berbés.
Tras a súa estancia en Lugo, a mostra viaxará a Melgaço, onde o creador xa é amplamente coñecido grazas ás distintas exposicións realizadas en territorio portugués.
Retratos con identidade propia
Entre as obras que integran “Mulleres” figuran títulos como Calidoscopio, Muller con chambra, Muller arraiana, Muller con diadema, Friaxe, Descendencia, Espichando o millo, Pardis, Acougo, Pandereteira, Zamburiñeira, Dona das cunchas, A dona e o can, Muller con pendentes, Beizos vermellos, Muller con zapatos dourados e cos pés na area, A colleita é en setembro ou a peza titulada en asturiano Muyer con flores d'abril.
A mostra permite apreciar tamén unha das principais características da obra de Fontes: a utilización de materiais pouco convencionais. O artista incorpora con frecuencia elementos reciclados e naturais como cascas de noz, cunchas de mexillón, navallas mariñas ou tapóns, empregando neste caso palés de madeira como soporte creativo.
Inauguración con ampla representación cultural
A presentación da exposición correu a cargo de Mercedes Saavedra e contou coa asistencia de destacadas personalidades do ámbito cultural galego, entre elas os artistas cegados da comarca do Deza Xosé Antonio Fondevila e o escritor Manuel Núñez Fiuza, ademais da artista lucense e comisaria Dolores Guerrero e numerosos amigos e seguidores do creador arraiano.
Un currículo marcado pola itinerancia
A actividade expositiva de Xulio Fontes levou a súa obra a numerosos espazos culturais de Galicia. Entre eles destacan o Auditorio Reveriano Soutullo de Ponteareas, a Casa da Cultura de Tomiño ou o espazo Detrás do MARCO, en Vigo, cidade na que reside actualmente, concretamente no barrio do Calvario.
O seu amplo currículo inclúe tamén a participación na exposición itinerante “Os Muíños do Picón e do Folón, a través da plástica polo Camiño Portugués de Lisboa a Santiago de Compostela”, unha iniciativa cultural que xa percorreu lugares como a Casa dos Alonso da Guarda, o Pazo de Mos, o Faro Vilán de Camariñas e que durante este mes poderá visitarse tamén no Museo do Mar da Costa da Morte.
Con “Mulleres”, Xulio Fontes reafirma unha vez máis a súa capacidade para combinar creatividade, identidade territorial e innovación artística, consolidándose como unha das voces máis singulares da plástica contemporánea galega.
DOCUMENTACIÓN: Manuel Estévez.
