A XXXIV Feira do Viño do Rosal volverá converter do 17 ao 19 de xullo a Praza do Calvario no gran escaparate dos viños da subzona do Rosal da Denominación de Orixe Rías Baixas, nunha edición que aposta por reforzar a identidade vitivinícola do municipio ao tempo que amplía a súa programación cultural, gastronómica e familiar.
A presentación oficial reuniu ao Concello do Rosal, á Asociación de Cabaqueiros do Viño do Rosal e ás once adegas participantes, que serán as grandes protagonistas dunha cita xa consolidada como unha das principais celebracións enolóxicas de Galicia e un importante motor de promoción do territorio.
A gran novidade deste ano será o Túnel do Viño, unha experiencia inmersiva que permitirá ao público descubrir as características, aromas e singularidades dos viños do Rosal guiados por un sumiller. Esta proposta substitúe a tradicional cata profesional do venres e estenderase durante as tres xornadas da feira, facendo máis accesible o coñecemento da cultura vitivinícola tanto para afeccionados como para visitantes.
Esta actividade desenvolverase no Museo do Cabaqueiro, un espazo que permitirá combinar a degustación dos viños coa descuberta dun dos oficios tradicionais máis representativos da identidade rosaleira, unindo patrimonio, cultura e produto local nun mesmo percorrido.
Outro dos grandes atractivos desta edición será o pregoeiro, Antonio Candelas, bioquímico, enólogo, xornalista e divulgador especializado na cultura do viño. Cunha ampla traxectoria profesional vinculada ao sector, dirixiu durante dez anos a revista MiVino e actualmente asesora adegas, denominacións de orixe e institucións en comunicación e estratexia vitivinícola.
A programación familiar continúa gañando protagonismo. Entre as propostas máis destacadas figura Girafes, o espectacular pasarrúas da compañía catalá Xirriquiteula Teatre, coñecida internacionalmente polos seus espectáculos de rúa. As súas xigantes xirafas percorrerán as rúas do Calvario interactuando co público e transformando o recinto da feira nun gran escenario ao aire libre.
A oferta para os máis pequenos completarase cos espectáculos Clownamorado, de Rudi Dudi, e O conto de Barrigaverde, de Fran Rei, ademais do tradicional obradoiro de cociña impartido por Isaac Míguez. Como novidade, incorporarase unha actividade sobre reciclaxe e sustentabilidade organizada por Biophilia Axencia Ambiental, que promoverá a reutilización de materiais relacionados co mundo do viño.
A música volverá ser outro dos piares fundamentais da feira. O cartel reúne formacións de estilos diversos como The Tetas' Van, banda integrada por mulleres que ofrecerá versións de pop-rock con mensaxes reivindicativas; El Cuarto de Tula, cun espectáculo dedicado á música cubana; e The Pretty Shirts, encargados de pechar o festival cun directo de rock and roll e garage rock.
As sesións vermú estarán amenizadas por Groovin Folks, cun repertorio que percorre clásicos do funk, soul, disco e rock desde os anos sesenta ata a actualidade, e polo dúo Awen, que mestura rock, soul e blues. A música tradicional chegará da man do Grupo de Gaitas Airiños do Folón, que percorrerá as rúas do Calvario.
O patrimonio rosaleiro tamén terá un papel destacado. Ademais do Museo do Cabaqueiro, o domingo celebrarase a visita interpretativa Os segredos de Mariña, un percorrido guiado polo Calvario que permitirá coñecer a historia e os recunchos máis emblemáticos da vila desde unha perspectiva ligada ao territorio.
A gastronomía volverá complementar a experiencia enolóxica cunha ampla oferta de establecementos, foodtrucks e postos de comida que combinarán receitas tradicionais e propostas innovadoras pensadas para maridar cos viños das adegas participantes.
A programación cultural completarase coa XXXI Mostra Filatélica do Grupo Filatélico e Numismático Val do Rosal e a presentación do seu selo conmemorativo; coa exposición Hábitats e horizontes: unha viaxe abstracta, da artista Esther Moe; coa mostra fotográfica Manxares, de Xulio Gil, integrada no proxecto Nortear 2026; e coa entrega dos premios do II Concurso de Relato Curto do Concello do Rosal, reforzando a dimensión cultural da feira.
A organización manterá tamén o compromiso coa sustentabilidade iniciado na edición anterior, cando o evento obtivo a certificación de festa sostible. Nesta ocasión volveranse utilizar vasos reutilizables para as bebidas distintas do viño, potenciarase a recollida selectiva de residuos, instalaranse puntos gratuítos de auga potable e desenvolveranse accións de sensibilización ambiental.
Así mesmo, repetirase o reforzo do servizo de autobuses para facilitar os desprazamentos entre O Rosal e distintos puntos da comarca, promovendo unha mobilidade máis segura e sostible durante os tres días da celebración.
Organizada polo Concello do Rosal e a Asociación de Cabaqueiros do Viño do Rosal, a feira conta co apoio dos fondos europeos do Programa INTERREG VI-A España-Portugal (POCTEP) 2021-2027, do Consello Regulador da D.O. Rías Baixas, da Deputación de Pontevedra, da Xunta de Galicia e de Abanca, entidades que contribúen a consolidar unha cita que ano tras ano reivindica a excelencia dos viños do Rosal e a riqueza cultural, patrimonial e gastronómica do Baixo Miño.
