A experiencia inmersiva Oríxenes, promovida pola Xunta de Galicia, aspira este martes en Bruxelas a facerse cun dos galardóns máis prestixiosos das artes dixitais a nivel mundial: os XR Awards, nos que compite na categoría de Mellor Experiencia Artística. A proposta, desenvolvida pola Cidade da Cultura en colaboración coa empresa galega Maxina, é ademais unha das tres únicas finalistas españolas nesta edición.
Recoñecemento á creación dixital galega
O Goberno galego cualifica esta clasificación como un recoñecemento á calidade e á innovación das experiencias de arte dixital que se están a desenvolver en Galicia, e en particular polo traballo impulsado dende o Gaiás en colaboración con operadores privados, como neste caso Maxina.
Lembra, ademais, que non é un feito illado: proxectos como Hábitats, producido tamén pola Cidade da Cultura, foron xa distinguidos en 2024 polo Observatorio da Cultura da Fundación Contemporánea como unha das iniciativas dixitais máis relevantes do Estado.
Uns premios de referencia internacional
Os AIXR XR Awards están organizados pola Academia Internacional de Realidade Estendida, entidade que distingue cada ano as propostas máis innovadoras no ámbito das tecnoloxías inmersivas. Considerados referencia mundial, estes premios buscan impulsar proxectos pioneiros e fortalecer unha comunidade internacional de profesionais, creadores e innovadores.
Máis de 30.000 visitantes en Oríxenes
Dirixida polo artista visual Carlos Seijo, Oríxenes estreouse no Museo Gaiás, onde máis de 30.000 persoas puideron gozar dun viaxe inmersivo no tempo, percorrendo as diferentes etapas de formación do planeta e dos orixes da vida.
A experiencia emprega realidade mixta, superpoñendo capas virtuais á arquitectura física do museo, permitindo aos visitantes caminar entre dous mundos: o físico e o dixital.
Aposta pola creación dixital en Galicia
A Consellería de Cultura, Lingua e Xuventude considera esta candidatura un aval ao traballo estratéxico da Cidade da Cultura, actualmente inmersa na creación do primeiro Centro de Artes Dixitais de Galicia, que estará operativo en 2026.
Oríxenes e Hábitats forman parte dunha liña consolidada no Gaiás, con proxectos destacados como Carne y Arena, Galiverso, Castelao. Mirar por Galicia ou o recente foro internacional SENTE, que reuniu en Santiago a referentes mundiais da arte dixital.
Innovación, accesibilidade e inclusión
En coherencia coa Lei de cultura inclusiva e accesible de Galicia, a Xunta destaca que estas propostas dixitais favorecen unha experiencia libre de barreiras e integradora de novos públicos.
No caso de Oríxenes, utilizáronse chalecos táctiles de vibración, unha tecnoloxía que enriquece a percepción sensorial e que resulta especialmente útil para persoas xordas ou con discapacidade auditiva, reforzando o carácter inclusivo da experiencia.
