A Xunta de Galicia intensifica a súa loita contra a hepatite C a través do seu plan de eliminación, posto en marcha en xullo de 2023, e xa realizou máis de 283.000 probas, detectando 372 casos positivos. Así o destacou a directora xeral de Saúde Pública, Carmen Durán, durante a súa participación hoxe en Vigo no XIX Curso en avances en infección VIH e hepatites virais, onde presentou o relatorio "Historia dun éxito: o Plan de Eliminación da Hepatite C en Galicia".
Durán subliñou a importancia do cribado oportunista que se está a levar a cabo actualmente en atención primaria. Ás persoas de entre 40 e 69 anos que acoden á consulta para realizar calquera analítica, ofréceselles a posibilidade de realizar unha proba de detección da hepatite C. No caso de non precisar unha analítica por outros motivos, infórmaselles sobre a enfermidade para que poidan decidir se solicitan a proba de detección precoz.
Galicia foi pioneira na implantación deste cribado oportunista, unha iniciativa que a Alianza para a eliminación das hepatites víricas en España sinala como exemplo para outros sistemas sanitarios.
Segundo as estimacións para este 2025, na cohorte de persoas nacidas entre 1974 e 1983 (máis de 440.000 persoas), espérase unha prevalencia de infección activa do 0,14 %. Este dato reflicte o impacto das medidas de detección precoz impulsadas pola Xunta.
