O presidente da Deputación de Pontevedra, Luis López, iniciou unha visita de tres días a Bruxelas participando na presentación de viños con denominación de orixe galega no Parlamento Europeo. Este evento marcou o comezo dunha serie de encontros de traballo con representantes da Unión Europea.
Acompañado polo deputado de Fondos Europeos, Javier Tourís, Luis López reuniuse co director da Fundación Galicia Europa, Jesús María Gamallo, para abordar temas de interese para a provincia relacionados coa Unión Europea e os fondos comunitarios. A axenda do presidente provincial na capital europea, que se prolongará ata o venres, inclúe reunións destacadas cos responsables da Comisión de Desarrollo Regional e con membros da Comisión Europea vinculados ao programa Europe Direct.
Durante a presentación dos produtos vinícolas galegos no Parlamento, entre os que destacou a Denominación de Orixe Rías Baixas, o mandatario provincial subliñou a importancia do enoturismo e dos viños da provincia como embaixadores dun destino turístico ligado ao territorio, sustentable e cunha oferta cultural diversa, desestacionalizada e descentralizada. As experiencias relacionadas co viño son un dos maiores atractivos da campaña de promoción de Turismo Rías Baixas, que busca valorizar o paraíso interior da provincia.
O goberno provincial considera a Unión Europea un aliado estratéxico para a transformación e modernización da provincia. Na web da Deputación de Pontevedra habilitouse recentemente unha sección específica para dar a coñecer os proxectos impulsados con fondos europeos. Nesta sección, os usuarios poden informarse sobre preto de 40 proxectos de diversa índole, que abarcan desde a cooperación cos gobernos locais ata plans de dixitalización, eficiencia enerxética, reto demográfico e acción comunitaria.
"Europa importa e aporta. Así que queremos ter presenza alí, levar os nosos proxectos e enriquecernos con outras experiencias de éxito que se poden aplicar á provincia", explicou o presidente Luis López sobre os obxectivos desta viaxe institucional.
