O primeiro premio no concurso de Noveis Deseñadores foi para Uxía Loureiro, coa colección ‘A Orixe’; o segundo para Fabiola Santos Baña, con ‘Tecer’; e o terceiro para Sofía Sánchez Rey e Santiago Iglesias, con ‘F.37’. A colección ‘máis comercial’ foi para ‘Isleño’, de Inmaculada Dios González.
![Os gañadores coa alcaldesa de Camariñas, Sandra Insua Rial (centro).](/media/diariolusogalaico/images/2023/04/09/2023040922573327648.jpg)
Santiago Iglesias Alonso, un nevense de Tortoreos, coa súa compañeira Sofía Sánchez, de Sada, presentaron unha colección baseada no transatlántico naufragado ‘Titanic’. Fixeron un labor de investigación e atoparon un artigo onde se relataba que no ‘Titanic’ viaxaba un mostrario de encaixe de Camariñas que levaba unha señora chamada Concepción. A señora viaxaba no camarote F. 37, que deu nome á colección.
Santiago e Sofía tentaron unir as tres clases sociais de pasaxeiros do barco a través do encaixe, cousa que daquela era moi frecuente na roupa, sobre todo interior. “Presentamos deseños con tecidos de cores suaves, transparencias, con cordas e perlas como adornos. Todo en tons pasteis, branco, rosa suave...”.
![O primeiro Look de Santiago Iglesias e Sofía Sánchez.](/media/diariolusogalaico/images/2023/04/09/2023040922573310332.jpg)
Un total de 4 conxuntos ou ‘looks’ femininos de Santiago e Sofía que foron á pasarela. Un xustillo (corsé) e vestido; unha saia con blusa; xustillo, blusa e pantalón e un vestido completo.
A ultima modelo portaba unha carta na que se dicía que o mostrario non chegara a tempo ao seu destino, un mes despois da partida no ‘Titanic’.
Iglesias está moi contento deste 3º premio. Este mesmo mes volve a Madrid para presentar un proxecto de moda sostible.
A edición número 32 da Mostra do Encaixe de Camariñas finalizaba cun novo éxito ao lograr 22.002 visitantes, a mellor cifra desde 2015, cando se superaron os 23.000.