Tui iniciou o venres un novo Camiño de Nadal, un itinerario festivo que encherá a cidade de luz, tradición e ilusión compartida até o vindeiro 6 de xaneiro. Cunha coidada decoración, un amplo programa de actividades e unha iluminación que abrazará tanto o centro urbano como as parroquias, o municipio converterase nun dos escenarios máis especiais destas festas no sur de Galicia.
A encargada de dar inicio oficial ao Nadal tudense será a Fada do Aloia, acompañada de elfos e de numerosos nenos e nenas. Será ela quen, ás 18.30 horas, desde o Palco da Música no Paseo da Corredoira, acenda as 504.346 lámpadas LED e os 5.593,97 m² de elementos luminosos de baixo consumo que vestirán rúas, prazas e accesos a todas as parroquias. Entre os puntos máis emblemáticos destacan o oso de luz da praza da Inmaculada e o cedro natural de 30 metros situado no cruzamento entre a Corredoira, Maristas e a avenida da Concordia.
A maxia tamén fará a súa aparición: unha fina nevarada artificial achegará un ambiente propio do centro de Europa á praza da Inmaculada, que este ano será o punto no que conflúan todos os camiños deste Nadal.
Un Mercado de Nadal máis grande e o tradicional Belén de Mingos
No corazón deste Camiño de Nadal atópase o Mercado de Nadal, que nesta edición crece até os 25 postos entre casetas de madeira e foodtrucks, distribuídos entre a parte peonil do Paseo da Corredoira e a praza da Inmaculada. Un espazo perfecto para o encontro cidadán, compras artesanais e gastronomía de inverno.
Moi preto, tamén mañá, será inaugurado o tradicional Belén de Mingos na Oficina de Turismo. Con preto de 14 metros cadrados de artesanía e máis de 300 figuras, moitas con movemento, o belén volve ser unha das grandes referencias do Nadal tudense.
A Árbore dos Desexos, solidariedade no corazón de Tui
A solidariedade terá un papel protagonista coa Árbore dos Desexos, situada na praza da Inmaculada nunha iniciativa promovida por Miguel Veiga, en colaboración co Concello de Tui e SOS Tomiño-Baixo Miño. A través dela volveranse cumprir os soños de nenos e nenas de familias desta entidade social, reforzando o espírito solidario destas datas.
A música comeza a soar coa rondalla O Mosteiro de Pexegueiro
O capítulo musical abrirase este sábado ás 18.00 horas no Paseo da Corredoira coa actuación da rondalla tudense O Mosteiro de Pexegueiro, que marcará o comezo das actividades culturais programadas.
Un convite a percorrer o Nadal tudense
O Concello de Tui convida á veciñanza e visitantes a percorrer este Camiño de Nadal desde mañá venres, cando terá lugar o acendido oficial e as primeiras actividades dun programa amplo e diverso que será presentado na súa totalidade nos próximos días.
