Soraya e os artistas locais brillan no acendido do Nadal no Porriño
O Porriño acendeu este xoves as luces de Nadal nunha festa plenamente familiar. A cativada gozou ao grande cos seus gorros de Papá Noel con estrelas iluminadas, mentres a música —moita música— enchía as rúas. Panxoliñas dende as ventás, dende os balcóns e dende o escenario acompañaron unha tarde chea de ambiente e ilusión.
O momento máis emocionante chegou co acendido oficial, no que o alcalde cedeu o protagonismo a un grupo de usuarios de Aceesca, Afaga, Vide e dos centros de día do municipio. Foi un xesto cargado de simbolismo, un impulso á inclusión e un verdadeiro testemuño para toda a cidadanía.
Os artistas locais tamén concitaron un gran interese entre o público coas súas interpretacións. A máis popular, a porriñesa Noemí Fernández, compartiu escenario con Iker Faguer, coa moi nova Laura Carmona e con Lucas, acompañado dun grupo de músicos de gran nivel profesional.
Un dos momentos álxidos da tarde foi a estrea da panxoliña de O Porriño, composta expresamente para a ocasión. O público que enchía a Praza do Concello escoitouna con orgullo, coas voces dos intérpretes —entre eles, a propia Noemí— emocionando aos presentes.
Pero o prato forte da xornada foi, sen dúbida, Soraya. Tras a animación dun DJ que quentou o ambiente durante media hora, a artista subiu ao escenario para ofrecer un espectáculo no que exhibiu a súa potente voz, a súa enerxía e a súa versatilidade dentro do pop, da electrónica e dos ritmos latinos. Co seu estilo coidado e a súa proximidade, deixou tamén unha mensaxe solidaria cando preguntou aos nenos e nenas porriñeses se estaban desexando que chegasen os Reis para recibir os seus agasallos, “pero sen pasarse...”.
Coa temperatura suave e sen ameaza de chuvia, o Acendido de Nadal converteuse nun acto especialmente agradable, nunha vila que luce estes días espectacularmente iluminada.