O Porriño vivirá mañá unha das xornadas máis especiais do ano cunha gran festa de benvida ao Nadal, na que a música, a luz e o espírito festivo serán protagonistas. O acto central será o acendido do alumeado, previsto para as 20.15 horas na Praza do Concello, un momento que marcará o inicio dunha programación navideña cargada de emoción e actividades que se darán a coñecer nos próximos días.
Os eventos arrancarán ás 18.30 horas coa representación do contacontos interactivo de Lalá Teatro, Un conto de Nadal, pensado para que as familias gocen dunha proposta lúdica e participativa.
Un acendido inclusivo e cheo de simbolismo
Un dos momentos máis emotivos chegará co acto oficial de acendido, que volverá a ser un xesto de inclusión: un grupo de usuarios de Aceesca, Afaga, Vide e dos centros de día do municipio serán os encargados de premer o botón que iluminará o Nadal porriñés.
Este ano, o municipio estreará un espectacular teito de luces de 30 metros de longo, 7 de alto e 8 de ancho, formado por 75.000 microleds, que ofrecerá cada día un espectáculo sincronizado de luz e son, converténdose nunha das grandes novidades deste Nadal.
En total, o alumeado contará con 157 arcos luminosos, 2.176 elementos decorativos, 990.422 puntos LED e unha superficie iluminada de 27.650 metros cadrados, distribuídos polas principais rúas e prazas do centro urbano e por diversos puntos singulares das parroquias.
Música e festa para continuar a celebración
Tras o acendido, a música tomará o protagonismo coa celebración do concerto “Voces do Porriño”, no que diferentes artistas locais interpretarán a estrea da panxoliña O Nadal no Porriño, acompañada de varias sorpresas preparadas para a ocasión.
A continuación, ás 21.30 horas, será a cantante Soraya quen se suba ao escenario para ofrecer un espectáculo cheo de enerxía e ambiente festivo. Como broche final, a partir das 22.30 horas, a festa continuará cunha sesión DJ.
Un Nadal participativo
O alcalde, Alejandro Lorenzo, subliñou que “este acendido é moito máis ca un acto oficial, é unha festa de benvida a unhas datas moi especiais e un momento para compartir xuntos. Queremos que o Nadal no Porriño sexa participativo, inclusivo e cheo de vida. Será o comezo dunha programación extensa e ilusionante que temos preparada para este Nadal. Queda moito por diante e animamos a todos os veciños e veciñas, maiores e pequenos, a participar e desfrutar de todas as actividades que se celebran a partir de mañá”.
