O Porriño incorpora trece persoas desempregadas para reforzar servizos municipais grazas ao Plan Máis Provincia
O Concello do Porriño vén de dar un impulso ao emprego local coa incorporación de trece persoas desempregadas a distintos departamentos municipais. Esta iniciativa enmárcase na Liña 3 do Plan máis Provincia 2025 da Deputación de Pontevedra, que busca fomentar a contratación laboral nos concellos.
Esta primeira fase dun proxecto máis amplo contempla a creación dun total de dezaoito postos de traballo, cun investimento que supera os 282.000 euros, dos cales máis de 211.000 son achegados pola Deputación.
As novas contratacións abranguen diversos perfís profesionais destinados a fortalecer os servizos públicos municipais. No departamento de obras sumáronse un oficial de primeira carpinteiro, un soldador e un palista, que realizarán tarefas de mantemento e mellora en espazos públicos e instalacións do concello. O servizo de parques e xardíns incorporou cinco peóns forestais, que se encargarán de labores de roza, limpeza e acondicionamento de zonas verdes e contornos naturais.
Ademais, reforzouse a atención nas instalacións municipais coa chegada de catro conserxes que prestarán servizo en diferentes dependencias. Por último, a Unidade Asistencial de Drogodependencias contará co apoio dun auxiliar de enfermaría para as tarefas de seguimento e atención ás persoas usuarias.
O alcalde do Porriño, Alejandro Lorenzo, destacou que “cada posto que se crea abre unha porta a novas posibilidades. Sabemos que hai persoas que levan tempo buscando unha oportunidade, e este tipo de iniciativas serven precisamente para iso: para dar ese primeiro paso, para volver entrar no mundo laboral e sentirse útil. É unha das formas máis directas de apoiar ás persoas e, ao tempo, mellorar os servizos que prestamos desde o Concello”.
A concelleira de Emprego e Formación, Rosario Costas, engadiu que “hai moitas persoas con capacidade e disposición para traballar que só precisan que alguén lles dea unha oportunidade. Desde o Concello queremos seguir sendo esa porta de entrada, ese empurrón que moitas veces marca a diferencia”.
O Concello do Porriño anunciou que nos próximos días se iniciará o proceso de selección de varios perfís técnicos para ampliar este impulso ao emprego local noutros departamentos municipais.
Con esta acción, o Concello reafirma o seu compromiso coa promoción do emprego, a inclusión social e o fortalecemento dos servizos públicos, grazas á colaboración entre administracións.