Covelo ponse en festas: tradición, verbenas e motos para recibir agosto

Covelo continúa o seu intenso verán festivo cunha ampla programación que levará música, tradición, gastronomía e actividades para todas as idades ás parroquias de Barcia de Mera, Godóns e Santiago de Covelo durante os días 31 de xullo e 1 e 2 de agosto.

Tras as Grandes Festas Patronais e do Churrasco, chega agora a quenda das parroquias, que tomarán o relevo cunha axenda na que convivirán as celebracións relixiosas, as verbenas, os xogos populares e unha nova edición da Concentración Moteira Ordas do Sur.

Barcia de Mera honra a Virxe das Dores

A parroquia de Barcia de Mera iniciará as súas festas o 31 de xullo, ás 23.00 horas, cunha verbena na praza parroquial, situada no núcleo de San Amaro. A noite estará amenizada por Wilson Band e América.

A celebración continuará o 1 de agosto, tamén ás 23.00 horas, cunha segunda verbena a cargo do Trío Nostalgia e da orquestra Gran Parada.

O domingo 2 de agosto, día grande dos festexos, celebrarase ás 12.30 horas a misa solemne, seguida da tradicional procesión acompañada por un grupo de gaitas. Pola noite, desde as 23.00 horas, o Trío La Noche del Grove será o encargado de poñer o broche final a tres xornadas de celebración.

Godóns mantén viva a tradición do Ramo

Godóns celebrará as súas festas na honra da Virxe do Rosario cun programa que combina tradición, cultura popular, música e actividades de lecer.

As celebracións comezarán o 31 de xullo, ás 20.00 horas, coa terceira edición do Torneo de Futbolín. A xornada contará tamén con cantina, bocadillos e música.

O 1 de agosto desenvolverase unha intensa programación que arrancará cunha misa ás 12.00 horas e continuará coa sesión vermú das 13.00 horas. Pola tarde celebrarase o III Torneo de Tute, ás 16.00 horas; un rastrexo infantil, ás 18.00; e a actuación de The Cream, ás 20.00 horas.

A partir das 23.30 horas, a Discomóbil Will e Arizona animarán a gran verbena nocturna.

O 2 de agosto, ás 11.30 horas, terá lugar a tradicional saída do Ramo de Godóns, un dos actos máis representativos da identidade cultural da parroquia. Ás 12.00 horas celebrarase a misa solemne, seguida da procesión. A sesión vermú, amenizada por Os da Cocheira, pechará os festexos.

Coincidindo coa celebración, a Asociación Cultural Ramo de Godóns continúa desenvolvendo unha iniciativa para recuperar, documentar e divulgar a historia desta tradición. O obxectivo é conservar, protexer e poñer en valor unha manifestación cultural tamén presente noutras parroquias do norte de Covelo e na veciña Maceira.

Santiago de Covelo, punto de encontro dos moteiros

A parroquia de Santiago de Covelo, capital municipal, converterase novamente nun dos grandes puntos de encontro da localidade coa celebración da IX Concentración Moteira Ordas do Sur.

A programación arrancará o 31 de xullo coa recepción dos participantes e unha sesión musical a cargo dun DJ.

O 1 de agosto terá lugar unha ruta moteira con saída desde o concello do Porriño. Un dos momentos máis destacados será a exposición das motocicletas diante da Casa do Concello de Covelo.

Pola tarde realizarase unha nova ruta polo contorno e, ao regreso, o público poderá gozar dos concertos de El Tren, banda tributo a Leño e Rosendo, e Mala Hierba, ademais dunha sesión de DJ.

A concentración despedirá os participantes o 2 de agosto. Durante as xornadas do 31 de xullo e do 1 de agosto haberá servizo de cantina, bocadillos e empanadillas. Todas as actividades desenvolveranse no campo municipal de fútbol Amable Ramón Martínez Vidal, “Moncho”.

Con esta variada programación, Covelo volve demostrar a vitalidade das súas parroquias e a súa capacidade para combinar festas patronais, patrimonio cultural, tradicións populares e propostas de lecer. Un calendario que converterá o municipio nun dos principais focos de actividade social e festiva da comarca durante a primeira fin de semana de agosto.