domingo. 21.04.2024

Mostra do Encaixe, exemplo de actualización dos oficios artesanais tradicionais

Como cada ano, na programación da Mostra os desfiles de moda teñen especial protagonismo, entre os que se atopan o Desfile de Noveis Deseñadores, o de firmas de moda, o desfile Reencáixame – novidade desta edición na que os deseñadores deberán reinterpretar coleccións non actuais empregando encaixe de Camariñas – ou o desfile ArteEncaixe, no que se amosa o encaixe desde a perspectiva doutras disciplinas da artesanía.
Camariñas, pueblo marinero, famoso por sus encajes de bolillos, de forma tradicional.
Camariñas, pueblo marinero, famoso por sus encajes de bolillos, de forma tradicional.

O director xeral de Comercio e Consumo, Manuel Heredia, e a xerente da Fundación Artesanía de Galicia, Elena Fabeiro, participaron hoxe na inauguración da XXXIII edición da Mostra do Encaixe, que se celebra en Camariñas ata o día 31 de marzo. Na súa intervención, Heredia destacou o papel deste evento como exemplo de conservación, reinterpretación e actualización continua dun oficio tan tradicional en Galicia como é o do encaixe, e da súa incorporación a outros ámbitos entre os que destaca o da moda.

A Xunta colabora habitualmente neste evento que está organizado polo Concello de Camariñas e pola Deputación da Coruña, e que está consolidado como un escaparate do encaixe e da súa vinculación con outros ámbitos entre os que destaca o da moda, así como un motor de dinamización económica e turística da zona que proxecta a imaxe de Galicia e dos seus oficios artesanais no exterior.

Como cada ano, na programación da Mostra os desfiles de moda teñen especial protagonismo, entre os que se atopan o Desfile de Noveis Deseñadores, o de firmas de moda, o desfile Reencáixame – novidade desta edición na que os deseñadores deberán reinterpretar coleccións non actuais empregando encaixe de Camariñas – ou o desfile ArteEncaixe, no que se amosa o encaixe desde a perspectiva doutras disciplinas da artesanía. Na edición deste ano, contarase coa participación de obradoiros inscritos na marca Artesanía de Galicia como Estilo Aramar (tocados e sombreiros), Lola Logaro (calceta e gancho), Mar Barral (cerámica), Suso Calo (xoiería), Ondas do Mar (encaixe), ou os obradoiros de olería de Buño Alfarería Rulo e Feituras.

Heredia sinalou tamén a importancia de Camariñas como catalizador do talento mozo e da remuda xeracional nun dos oficios máis tradicionais de Galicia, onde se está a facer unha forte aposta por amosarlle ás novas xeracións as técnicas desta arte a través das Escolas Municipais de Palillo que tamén terán o seu espazo no programa da Mostra.

No evento contarase tamén con demostracións en vivo, obradoiros de encaixe, actuacións musicais e mostradores de exposición e venda, entre os que se atopan 11 delegacións internacionais procedentes de Bulgaria, Eslovaquia, Francia, Italia, Polonia, Portugal ou República Checa. O evento abre hoxe as súas portas de 15:00 a 21:00h, o xoves 28, o venres 29, o sábado 30 e o domingo 31 de marzo, en horario de 11:00 a 21:00 horas.

Mostra do Encaixe, exemplo de actualización dos oficios artesanais tradicionais
Comentarios