O concello de Tui amplía a programación do seu "Setembro Xudeu" coa proxección da película portuguesa "Sefarad", dirixida por Luís Ismael. A cita terá lugar este xoves, 11 de setembro, ás 20:00 h, no Espazo Sociocultural da rúa Camilo José Cela.
A historia de Barros Bastos, un 'Dreyffus' portugués
A película, estreada en 2019, reconstrúe a épica historia da comunidade xudía de Porto ao longo de varios séculos. O filme céntrase na figura de Artur Carlos de Barros Bastos, un capitán do exército portugués que, nas primeiras décadas do século XX, loitou por reunir os criptoxudeus que mantiveran a súa identidade e rituais en segredo desde o edito de expulsión e conversión forzada de 1496.
A traxectoria de Barros Bastos, falsamente acusado de diversos delitos e destituído do exército, foi un caso que a miúdo se compara co "affaire Dreyffus" de Francia. A película documenta e recupera esta historia de esperanza, fe e humanidade.
Un director premiado
Luís Ismael (1971) é un dos cineastas máis importantes de Portugal, coñecido pola triloxía "Balas e Bolinhos" e por "1618", a película portuguesa máis premiada da historia. A súa participación no "Setembro Xudeu" de Tui é un evento destacado, xa que, segundo a concelleira de Turismo e Patrimonio, Ana María Núñez Álvarez, a proxección en colaboración co Cine Club Tui "achéganos ao coñecemento do proceso de recuperación da memoria dos xudeus portugueses".
