O Concello do Porriño iniciou esta semana un importante proxecto de repavimentación en cinco camiños da parroquia de Budiño: Mantelle, Vacaría, A Chan, O Casal e Cerquido. Estas actuacións, que se enmarcan no compromiso municipal de mellorar as infraestruturas e dinamizar o rural, prevén rematar nunha semana.
Mellora da seguridade e calidade dos accesos
As obras, cun orzamento de 100.093,20 € (IVE incluído), están financiadas na súa totalidade pola subvención do Plan+Provincia2024 da Deputación de Pontevedra. O obxectivo principal é solucionar o mal estado destes camiños municipais, incrementando a seguridade viaria e a calidade dos accesos para veciños e usuarios.
O proxecto inclúe unha serie de actuacións fundamentais:
- Limpeza e desbroce das marxes e arcéns para asegurar unha boa drenaxe e visibilidade.
- Fresado do firme existente, eliminando as zonas deterioradas para crear unha base adecuada para o novo pavimento.
- Aplicación de capas de aglomerado en quente, con espesores que garanten a durabilidade e resistencia do novo firme.
- Realce das tapas de rexistro para evitar danos e mellorar a seguridade.
- Marcado viario reflectante e pintura termoplástica de símbolos e frechas para facilitar a circulación e a seguridade.
Compromiso con todas as parroquias
A mellora dos viais e do saneamento é unha das máximas prioridades do goberno municipal. "Sabemos que unhas boas comunicacións e uns servizos básicos axeitados son fundamentais para garantir a calidade de vida da veciñanza", asegura o alcalde do Porriño, Alejandro Lorenzo.
Neste sentido, o Concello está a desenvolver un plan integral de actuacións en todas as parroquias, con proxectos definidos tanto para a renovación e mellora dos viais como para a extensión e modernización das redes de saneamento, adaptándose ás necesidades específicas de cada zona.
O alcalde do Porriño, Alejandro Lorenzo, supervisa os traballos de mellora nos camiños da parroquia de Budiño, unha actuación financiada polo Plan+Provincia2024 que busca mellorar a calidade de vida no rural.
"O noso obxectivo é construír un Porriño máis conectado, máis limpo e máis sostible, con infraestruturas modernas e eficaces, á altura do que merece a nosa cidadanía", subliñou o rexedor.
Os camiños que recibirán estas melloras teñen lonxitudes que oscilan entre os 145 e os 350 metros, cun ancho medio de entre 4,5 e 5 metros, garantindo así unha mellor circulación tanto de vehículos como de peóns. Este investimento reafirma o compromiso do Concello do Porriño coa calidade de vida dos seus veciños, especialmente no medio rural, onde a mellora das infraestruturas é fundamental para o desenvolvemento e a conexión dos núcleos de poboación.
