viernes. 29.03.2024

A Festa do Vinho Verde de Ponte de Lima: unha exaltación da vida

Que veña o viño e veña a vida. A beber e a vivir. Non en van, xa os romanos dicían iso de “Beati hispani, quibus vivere bibere est”; é dicir, “Benditos os hispanos (os habitantes da península ibérica, portugueses e españoles hoxe), para quen vivir é beber”. Dicíano porque non diferenciaban a pronuncia dos fonemas “b” e “v”, si, pero tamén –se non, buscarían outro símil– polo seu amor polo viño. Polo seu amor e mais polo seu bo facer.
Amancio Cerqueira guiou a visita da Secretaria de Estado, Isabel Ferreira.
Amancio Cerqueira guiou a visita da Secretaria de Estado, Isabel Ferreira.

“Si viene el vino, viene la vida”, cantaba o arxentino Horacio Guaraní. Se vén o Viño Verde, vén a vida a Ponte de Lima e a todos os que se achegan a ela. E a XXX Festa do Vinho Verde e dos Produtos Regionais tráenos esta vida cada ano desde hai trinta, porque xa son tres décadas as que cumpriu este evento tan importante para o norte de Portugal e que a tantos galegos atrae.

A Festa celebrouse esta pasada fin de semana –do 10 ao 12 de xuño– no Pavillón de Feiras e Exposicións Expolima cunha calor afogante, como se tampouco o particular clima da zona quixese faltar á cita, lembrando que é, canda o solo e as castes de uva, un dos segredos destes viños extraordinarios. Xaora que o loureiro é a variedade raíña, mais non a única, nin moito menos: velaí, por exemplo, o albariño, irmán do de Galicia, e varias máis.

Isabel Ferreira, secretaria de Estado de Desenvolvemento Rexional, foi a convidada.
Isabel Ferreira, secretaria de Estado de Desenvolvemento Rexional, foi a convidada. Ao lado do alcalde de Ponte de Lima, Vasco Ferrás (dereita) e o edil Carlos Lago. FÉLIX CABALLERO.

Foron moitos os produtores que expuxeron as súas creacións, despois de dous anos de ausencia por mor da covid. Había gañas de amosar os produtos e tamén de ir velos e degustalos. O oferta tan grande fixo case interminable o percorrido polos postos da secretaria de Estado de Desenvolvemento Rexional, Isabel Ferreira, que veu pór de manifesto a importancia que o Goberno de Lisboa concede a este evento e a estes viños. Ferreira estivo acompañada polo alcalde de Ponte de Lima, Vasco Ferrás. Á Festa non faltou tampouco unha representación da Confraría do Vinho Verde –co seu gran mestre, Mariano Correia, á fronte–, que tanto fai pola proxeccion da compoñente cultural destes caldos.

A Festa do Vinho Verde e dos Produtos Regionais de Ponte de Lima está a recoller nos últimos anos o traballo esforzado de varias xeracións de agricultores, produtores e comerciantes, e mais de dúas institucións educativas tan importantes para a zona como son a Escola Rexional de Agricultura e Desenvolvemento Rural e a Escola Superior Agraria, que naceu vencellada ao Instituto Politécnico de Viana do Castelo.

Ferreira quixo fotografarse con membros da Confradía do Vinho Verde.
Ferreira quixo fotografarse con membros da Confradía do Vinho Verde. FÉLIX CABALLERO.

A Festa ten ido ampliando o seu campo de acción a outros produtos gastronómicos da zona. Proba diso foi a degustación gratuíta coa que rematou o evento, na que, ademais do viño, os asistentes puideron catar queixos, embutidos e outras viandas que viñeron lembrar a todos ese ritmo lento da vida no rural que permite saborear non só a comida e mais a bebida, senón a existencia toda.

Os viños verdes son, se cadra, a meirande marca de identidade e prestixio desta rexión, mais non o seu único atractivo. Unha rexión, por certo, chea de historia. Non podemos esquecer que Ponte de Lima é considerada a vila máis antiga de Portugal debido ao foro que recibiu en 1125 de Teresa de Léon, filla de Afonso VI de Léon e nai de Afonso I de Portugal, o primeiro rei do novo Estado. Trátase dun destino turístico por excelencia, do que nos últimos meses está a dar tamén outras mostras como o Festival Internacional de Jardíns –inaugurado o pasado 27 maio e que se prolongará aínda ata o 31 outubro, ben entrado o outono– e aínda dará maís axiña coa XIV Féria do Cavalo, que terá lugar do 7 ao 10 de xullo.

A Secretaria de Estado visitou a todos os productores de vinho verde e outros de produtos rexionais.
A Secretaria de Estado visitou a todos os produtores de vinho verde .
-neste caso Casa da Cuca-  e outros de produtos rexionais. FÉLIX CABALLERO.

E volvendo ao viño, cómpre salientar que en menos de vinte días temos xa tamén a XXV Festa do Albarinho de Monçao, outro evento vitivinícola do que Portugal todo, e moi especialmente o norte, se pode sentir moi orgulloso.

Que veña o viño e veña a vida. A beber e a vivir. Non en van, xa os romanos dicían iso de “Beati hispani, quibus vivere bibere est”; é dicir, “Benditos os hispanos (os habitantes da península ibérica, portugueses e españoles hoxe), para quen vivir é beber”. Dicíano porque non diferenciaban a pronuncia dos fonemas “b” e “v”, si, pero tamén –se non, buscarían outro símil– polo seu amor polo viño. Polo seu amor e mais polo seu bo facer.

A Festa do Vinho Verde de Ponte de Lima: unha exaltación da vida
Comentarios