O Concello do Porriño reafírmase como un dos principais motores económicos da provincia, impulsado por unha notable dinamización da actividade empresarial e unha xestión urbanística áxil. No que vai de 2025, a Xunta de Goberno Local resolveu 62 expedientes de implantación ou modificación de actividades económicas, facilitando a apertura de novos negocios e a adaptación de locais en diversos sectores, segundo un comunicado do Concello.
Estes expedientes abranguen desde a restauración, o comercio e os servizos persoais ata a pequena industria, permitindo iniciar ou modificar o uso de espazos para o desenvolvemento de actividades económicas. A axilidade administrativa é clave para que negocios como restaurantes, tendas de roupa, salóns de peiteado ou pequenas fábricas poidan operar sen demoras innecesarias.
Este dinamismo enmárcase nun sólido panorama económico. O Porriño conta con máis de 2.200 empresas activas, máis de 3,5 millóns de metros cadrados de solo industrial ocupado e un dos PIB máis altos da provincia. Estas cifras reflicten a robusta estrutura empresarial do municipio e a súa capacidade para atraer e reter investimento.
O alcalde, Alejandro Lorenzo, subliña que "estes datos demostran que O Porriño é un concello que acompaña a quen quere emprender, con seriedade e axilidade administrativa. Queremos facilitar que se poñan en marcha proxectos sen atrancos burocráticos innecesarios". Pola súa banda, a concelleira de Urbanismo, Promoción e Xestión de Vivenda, Medio Ambiente e Mercados, Antía Carrera, recorda que "o departamento estaba colapsado e moitos expedientes de actividades levaban bloqueados desde os anos 90. Hoxe estamos a resolver esa situación e a poñer o foco no desenvolvemento económico local".
233 expedientes urbanísticos tramitados en 2025
O balance urbanístico total de 2025 pon de manifesto un volume de 233 expedientes resoltos en distintas tipoloxías, evidenciando a estabilidade e eficiencia na xestión do solo e das actuacións urbanísticas por parte do Concello. O departamento de Urbanismo mantivo unha dinámica constante de resolución de solicitudes, tanto recentes como correspondentes a exercicios anteriores.
Durante o ano, resolvéronse 13 expedientes de licenzas urbanísticas, fundamentais para a tramitación de actuacións de obra maior e usos urbanísticos diversos, como a construción de vivendas unifamiliares, novos edificios, rehabilitacións ou reformas de naves sen actividade.
No eido das primeiras ocupacións, resolvéronse 7 expedientes, o que permite o uso efectivo das edificacións unha vez finalizadas. Esta tipoloxía é esencial para o peche de obra e o inicio de actividade, xa que o Concello comproba que a obra executada se axusta á licenza concedida.
As comunicacións previas de obra menor seguen representando un volume destacado de actividade, con 151 expedientes resoltos ao longo de 2025. Destes, 106 corresponden a solicitudes deste mesmo ano, garantindo unha resposta áxil e eficiente á cidadanía para obras sinxelas como pintar unha vivenda, reformar un baño ou construír un galpón de menos de 25 metros cadrados.
Desde o Concello do Porriño reafírmase o compromiso coa mellora continua dos procedementos urbanísticos, poñendo o foco na atención á veciñanza, na dinamización económica e no cumprimento dos prazos e garantías legais.
