viernes. 07.10.2022

Novo Espazo Amizar, na Coruña

Os interesados poderán coñecer os detalles da reforma da antiga delegación de Sanidade de Gregorio Hernández, reconvertida agora en edificio administrativo, en horario de 10.00 a 14.00 horas e de 16.00 a 20.00 horas.
Os interesados poderán coñecer os detalles da reforma da antiga delegación de Sanidade de Gregorio Hernández, reconvertida agora en edificio administrativo, en horario de 10.00 a 14.00 horas e de 16.00 a 20.00 horas.

A conselleira de Infraestruturas e Mobilidade, Ethel Vázquez, participou hoxe nunha das visitas guiadas ao Espazo Amizar, que empezará a prestar servizos aos cidadáns xa a vindeira semana, logo dunha actuación de rehabilitación integral de “selo galego”.

Vázquez Mourelle, xunto co delegado da Xunta na Coruña, Gonzalo Trenor e o presidente da Autoridade Portuaria, Martín Fernández Prado, asistiron esta mañá a unha das xornadas de portas abertas que o Goberno galego vén realizando desde a pasada fin de semana para dar a coñecer aos cidadáns estas instalacións. Tamén participaron na visita guiada o vicepresidente do Parlamento, Diego Calvo, e a decana do COAG, Elena Ampudia.

A Xunta programou novas visitas para este sábado e este domingo dada a boa acollida que tivo a iniciativa, pois foron 1.000 as persoas que se achegaron ao edificio para coñecelo nas visitas organizadas a pasada fin de semana.

A xornada de portas abertas terá lugar hoxe e mañá en horario de 10 a 14 horas e de 16 a 20 horas. O acceso ás visitas é libre e os interesados deben presentarse na entrada principal uns minutos antes de cada recorrido. Durante a visita respectaranse todas as medidas de prevención sanitarias.

Nestas xornadas, os asistentes teñen a oportunidade de coñecer os detalles da reforma da antiga delegación de Sanidade de Gregorio Hernández, reconvertida agora en edificio administrativo.

O pasado 10 de xaneiro comezou o proceso de traslado dos 280 empregados públicos das consellerías de Emprego e Igualdade e de Política Social ás novas dependencias, polo que na vindeira semana xa se comezará a prestar servizos aos cidadáns nestas novas dependencias administrativas.

ESPAZO ADMINISTRATIVO SINGULAR

A actuación de rehabilitación integral levada a cabo no edificio é unha obra singular desde o punto de vista arquitectónico, con deseño e construción de selo galego, que supuxo un investimento autonómico de 7 millóns de euros.

O Espazo Amizar componse de dous edificios, vangardistas e modernos: un con forma de prisma, de 5 alturas, e outro con forma ovalada, de 4 andares, que ocupa o interior da parcela. Están conectados nos diferentes niveis e cun patio interior moi luminoso.

Con esta rehabilitación, dótase a cidade dun espazo administrativo de arredor de 6.000 m² para acoller a oficina de emprego, oficinas administrativas da Xunta e locais para organizacións sanitarias e sociais sen ánimo de lucro, reservándose 12 locais para este fin.

O edificio administrativo mellorará a prestación dos servizos aos cidadáns, ofrecerá máis confort e comodidade aos traballadores e permitirá un aforro de 750.000 euro ao ano en alugueiros, ademais de contribuír a facer cidade.

Ethel Vázquez detallou que a rehabilitación se fixo con mimo, coidando os detalles e empregando materiais de proximidade, como o granito do país para os solos, ou o castaño galego, empregado nas paredes interiores e na tarima da sala de usos múltiples. Unha rehabilitación, incidiu, “de selo galego”, cun arquitecto galego, empresas galegas e materiais galegos.

Novo Espazo Amizar, na Coruña