Un milleiro de maiores converte Os Milagres nunha xornada de encontro e convivencia

Preto dun milleiro de persoas vinculadas aos diferentes centros da Fundación San Rosendo participaron na tradicional peregrinación de maiores ao santuario dos Milagres, en Baños de Molgas, unha xornada que combinou devoción, convivencia e actividades protagonizadas polos propios residentes.

Usuarios, persoal e familias volveron reunirse nunha das citas anuais da entidade. Durante a mañá visitaron o santuario e, posteriormente, asistiron a unha representación teatral a cargo de residentes dun dos centros, antes de compartir un xantar de confraternidade.

Á celebración sumouse a conselleira de Política Social e Igualdade, Fabiola García, acompañada polo director xeral de Maiores e Atención Sociosanitaria, Antón Acevedo; o alcalde de Baños de Molgas, Manuel Ángel Fernández, e o presidente da Fundación San Rosendo, José Luís Gavela.

García destacou o traballo desenvolvido pola Fundación na atención ás persoas maiores e considerou que a súa dedicación e compromiso constitúen «unha garantía de benestar para os usuarios» e proporcionan tranquilidade ás súas familias.

A conselleira incidiu especialmente na aposta por unha atención humana, próxima e personalizada, e trasladou á entidade o apoio da Xunta para continuar avanzando no que definiu como un modelo de coidados «Galicia Calidade», no que as persoas ocupen o centro da atención.

Neste sentido, defendeu unha rede asistencial na que os centros funcionen como «auténticos fogares», capaces de proporcionar os coidados necesarios pero tamén unha atención digna, próxima e adaptada ás circunstancias de cada persoa.

A responsable de Política Social reafirmou finalmente a disposición da Xunta a colaborar coas entidades do sector para continuar mellorando a atención ás persoas maiores e consolidar un sistema no que a calidade asistencial vaia acompañada dun trato humano.

A peregrinación dos Milagres volveu deixar, por riba dos discursos institucionais, a imaxe de centos de maiores compartindo unha xornada fóra dos seus centros, participando nas actividades e facendo da convivencia a verdadeira protagonista da cita.