O presidente da Deputación de Pontevedra, Luis López, deu este venres o pistoletazo de saída ao Nadal na provincia cun emotivo acendido do alumeado no Pazo provincial acompañado dunha chocolatada aberta a toda a veciñanza. O acto serviu como inicio dunha completa programación repartida por numerosos concellos e pensada para todos os públicos.
Baixo o lema “Un Nadal que saia do noso interior”, a institución provincial aposta este ano por unha decoración baseada en especies vexetais autóctonas que visten tanto o Pazo provincial como o resto de edificios da Deputación. “Queremos lembrar a importancia do noso interior xeográfico, dos nosos montes, tan afectados este verán polos lumes; e tamén remarcar que o mellor de nós, o noso estilo de vida familiar e o noso carácter acolledor, levámolo no interior”, afirmou López antes de premer o botón que iluminou o recinto.
O público asistente puido degustar chocolate quente mentres gozaba da música en directo de Xigro’s Big Band e da exposición de 1.200 adornos da colección ViCo, pezas creadas para decorar árbores de Nadal e xa exhibidas en diferentes museos de España e Portugal. A iso sumouse un belén e o espectáculo visual das 250.000 luces eficientes que compoñen a iluminación deste ano no Pazo provincial.
“O Nadal comeza hoxe na provincia co acendido do alumeado nesta casa e nos demais edificios da Deputación. Desexámosvos unhas festas máxicas e que, no que queda deste ano e no vindeiro, saquemos o mellor de nós do noso interior”, engadiu o presidente no peche do acto.
Un Nadal cheo de música, obradoiros e propostas culturais
A programación prevista pola Deputación para estas festas inclúe o ciclo de concertos Entradiñas de Aninovo, que arrincará este sábado cun concerto gratuíto da Banda Filharmónica de Vigo en San Miguel de Oia. Ao longo do mes de decembro, diferentes municipios da provincia acollerán novas actuacións deste ciclo musical.
Pola súa banda, o Museo de Pontevedra inaugurará o 19 de decembro a súa última exposición do ano: “Debuxar coa luz. A fotografía en Pontevedra no século XIX”. Xunto á mostra organizaranse obradoiros dirixidos a nenas e nenos de 5 a 12 anos, que terán lugar os días 12, 26 e 30 de decembro e 2 de xaneiro, impartidos por Sofía Venzel e Míchel Casado, de Comité Ilustrado. A inscrición abrirase proximamente e a rapazada aprenderá a deseñar publicidade, crear colaxes, actualizar retratos do século XIX e elaborar o primeiro xornal do ano 2026.
