A conselleira de Vivenda e Planificación de Infraestruturas, María M. Allegue, anunciou hoxe en Vigo o compromiso da Xunta de Galicia de destinar 17,8 millóns de euros á prolongación do túnel de Elduayen. O proxecto, que estenderá o túnel desde a Porta do Sol ata o Barrio do Cura, conta así co apoio económico do Goberno galego para a súa execución.
Allegue, acompañada pola delegada territorial da Xunta en Vigo, Ana Ortiz, destacou que con este anuncio "cumprimos o compromiso que demos aos vigueses". A conselleira lembrou que a ampliación do túnel foi un dos puntos clave tratados na Comisión de Infraestruturas, un órgano creado trala reunión do ano pasado entre o presidente da Xunta, Alfonso Rueda, e o alcalde de Vigo, Abel Caballero.
Compromiso con Vigo e a petición de reciprocidade na ETEA
A decisión da Xunta chega despois de que se valorase a documentación enviada polo Concello de Vigo, o que permitiu confirmar a súa participación económica no proxecto. Allegue reiterou o "compromiso total coa cidade, onde esperamos seguir avanzando con máis proxectos".
Con todo, a conselleira tamén aproveitou a ocasión para solicitar ao alcalde de Vigo a mesma "responsabilidade" con outra infraestrutura de gran relevancia para a cidade: a ETEA. Neste sentido, Allegue recordou que a Xunta de Galicia xa ten todo preparado para a sinatura do convenio que permitirá o desenvolvemento do ámbito PS1 e está unicamente á espera de que o Concello vigués complete a súa parte do acordo.
