Tui deu este mediodía o pistoletazo de saída a dez días de festexos na honra a San Telmo cun pregón no que a presidenta do RC Celta, Marián Mouriño, puxo en valor a identidade da cidade e a súa estreita relación co club celeste.
Nun acto institucional celebrado na praza da Inmaculada e presidido polo alcalde, Enrique Cabaleiro, Mouriño agradeceu o convite para exercer de pregoeira e cualificou como un “privilexio” participar nunha xornada tan sinalada. Na súa intervención, destacou que Tui “non é só un lugar con historia, senón un lugar con identidade”, facendo fincapé no papel fundamental da veciñanza.
A presidenta do Celta subliñou a riqueza patrimonial da cidade, mencionando a catedral, o río Miño e o Camiño de Santiago, aínda que incidiu en que “o que realmente fai especial a Tui é a súa xente”, á que definiu como “unha comunidade con raíces profundas, que mira ao futuro sen perder o que a fai única”.
Mouriño referiuse tamén á cidade como “unha terra profundamente celtista”, lembrando a presenza histórica do club nas festas e os partidos disputados en Tui. Tivo palabras especiais para a Peña Celtista Tudense, “unha das máis antigas do club”, así como para o Tyde FC, ao que felicitou polo seu centenario, salientando que “cen anos son moito máis ca unha cifra: son xeracións, recordos e historias compartidas”.
Durante o acto, que contou coa presenza de membros da corporación municipal, do presidente da Cámara de Valença, José Manuel Carpinteira, e da directiva do Tyde, o alcalde agradeceu a dispoñibilidade de Mouriño para promocionar o 800 aniversario da consagración da Catedral de Tui, vinculando tamén o pregón coa efeméride do club tudense.
Como parte do intercambio institucional, o presidente do Tyde, David Domínguez, entregoulle á presidenta do Celta unha camiseta conmemorativa do centenario, mentres que Mouriño agasallou ao alcalde cunha camiseta celeste das festas. Ademais, recibiu un cadro co cartel oficial, obra do artista tudense Carlos Fer.
Coa lectura do pregón, arrincan en Tui dez días de celebración marcados pola tradición, a música e a participación veciñal, nunha cita que, como destacou a propia Mouriño, representa “unha gran xuntanza para estar xuntos e compartir”.
