O Concello de Mos celebrou esta mañá unha nova reunión da mesa de negociación sindical co obxectivo de abordar unha modificación puntual da Relación de Postos de Traballo (RPT) de cara ao orzamento municipal do ano 2026.
Na xuntanza estiveron presentes a alcaldesa de Mos, Nidia Arévalo, o concelleiro de Persoal e tenente de alcaldesa, Leo Costas, a xefa de Persoal do Concello, representantes das centrais sindicais C.S.I.F., C.C.O.O. e C.I.G., así como persoal técnico de asesoramento.
O goberno municipal presentou aos sindicatos a memoria técnica coa proposta organizativa dos postos de traballo para o vindeiro ano. A intención é estruturar as necesidades de persoal nos diferentes departamentos municipais para a súa inclusión no orzamento de 2026.
A proposta do executivo local atópase nun estado avanzado e agárdase que poida pecharse de xeito consensuado cos tres sindicatos nunha segunda sesión da mesa de negociación nas vindeiras semanas. O obxectivo é acadar este acordo definitivo a principios do verán, para así incorporalo ao proxecto orzamentario de 2026, cuxa aprobación está prevista para o último trimestre deste ano.
Un dos puntos salientables da proposta da alcaldesa Nidia Arévalo é un incremento significativo da dotación para o persoal de servizos excepcionais, cunha partida que ascendería a 250.000 euros, co fin de mellorar a calidade e eficiencia dos servizos municipais.
Dende o Concello de Mos destacaron o clima de diálogo e colaboración na mesa de negociación, considerándoo fundamental para unha xestión eficaz dos recursos humanos municipais e para dar resposta ás necesidades dos veciños e veciñas.
