A investigadora do IDIS Noa Carrera recibe a Axuda á Investigación en Nefroloxía 2025 da Sociedade Española de Nefroloxía

O proxecto, dotado con 24.000 euros, reforzará o equipo NefroCHUS do Instituto de Investigación Sanitaria de Santiago e busca avanzar na medicina de precisión aplicada ás enfermidades renais hereditarias.

A investigadora do Instituto de Investigación Sanitaria de Santiago de Compostela (IDIS), Noa Carrera Cachaza, foi distinguida coa Axuda á Investigación en Nefroloxía 2025 que concede a Sociedade Española de Nefroloxía (SEN) na categoría de investigación básica.

Esta contribución, dotada con 24.000 euros, permitirá reforzar o equipo de Xenética e Bioloxía do Desenvolvemento das Enfermidades Renais (NefroCHUS), liderado polo Dr. Miguel García González, e avanzar na transferencia de resultados á práctica clínica.

Un proxecto centrado na medicina de precisión

O traballo, titulado “Medicina de Precisión en Enfermidades Renais Hereditarias: Diagnóstico, Biomarcadores e Novas Terapias”, busca mellorar o diagnóstico xenético, desenvolver biomarcadores non invasivos e explorar novas terapias personalizadas para este tipo de patoloxías, responsables de ata o 15 % dos casos de enfermidade renal crónica (ERC).

“O obxectivo é avanzar nun diagnóstico precoz e implementar tratamentos personalizados que poidan transformar a atención clínica destas enfermidades”, explicou a doutora Noa Carrera, quen destacou tamén que este enfoque “mellorará a calidade de vida dos pacientes e contribuirá a un sistema sanitario máis sostible”.

Enfermidades renais hereditarias: un desafío crecente

Segundo o equipo de NefroCHUS, as enfermidades renais hereditarias afectan a máis de sete millóns de persoas en España e a súa prevalencia seguirá aumentando nas próximas décadas.

“Estímase que a enfermidade renal crónica será a segunda causa de morte en España a finais de século, cun impacto socioeconómico comparable ao da diabetes ou o cancro”, sinalan desde o grupo investigador.

A falta de biomarcadores eficaces para a detección temperá dificulta o diagnóstico precoz e limita as posibilidades terapéuticas nas fases iniciais. “Moitos pacientes descoñecen que padecen unha enfermidade renal ata fases avanzadas, cando o dano é xa irreversible”, subliña Carrera.

Tres eixos para avanzar na investigación

O proxecto desenvolverase cun enfoque traslacional baseado en tres liñas principais:

1. Identificación de novas causas xenéticas en pacientes sen diagnóstico previo, mediante secuenciación completa do xenoma e estudos funcionais.

2. Desenvolvemento de biomarcadores non invasivos a partir de vesículas extracelulares, proteínas e microARNs presentes en fluídos biolóxicos, para mellorar o diagnóstico temperán e a predición do prognóstico.

3. Avaliación de estratexias terapéuticas innovadoras, incluíndo técnicas de edición xenética en modelos celulares e animais.

Un equipo multidisciplinar de referencia

O proxecto é o resultado do traballo dun equipo multidisciplinar que integra especialistas en xenética, bioinformática, proteómica, investigación clínica e práctica nefrolóxica.

Forman parte del María Pardo Pérez, Pablo Pedrosa Lado, Jorge Amigo, Maxim Demetrios Samuel, Jesús Calviño Varela —xefe do Servizo de Nefroloxía do HULA e presidente da SGAN—, así como Raquel Martínez Pulleiro, Eloísa Sánchez Cazorla, Pedro Fortes González, Marta Vecino e Borja Temes Álvarez.

“O recoñecemento da SEN é un impulso para o noso grupo, que leva máis dunha década investigando as enfermidades renais hereditarias cun enfoque traslacional, desde a xenética ata a procura de novas terapias”, destacou Noa Carrera.

Compromiso coa transferencia e a colaboración

A axuda da Sociedade Española de Nefroloxía permitirá incorporar novo persoal investigador e desenvolver o proxecto durante os próximos dous anos. Os resultados difundiranse tanto na comunidade científica como entre as asociacións de doentes, reforzando o compromiso do IDIS e do grupo NefroCHUS coa investigación traslacional e a transferencia de coñecemento ao sistema sanitario e á sociedade.