O presidente da Deputación de Pontevedra, Luis López, recolleu na cidade francesa de Cannes o prestixioso Delfín de Prata co que foi recoñecida a campaña de promoción turística do destino Rías Baixas, titulada “Cando Volves?”.
Esta distinción, outorgada no festival Cannes Corporate Media & TV Awards, é o quinto galardón internacional que recibe a novidosa campaña. Por primeira vez, a promoción turística das Rías Baixas céntrase en dar a coñecer o interior da provincia de Pontevedra sen amosar ningunha imaxe do mar, rompendo coa tradición e buscando a descentralización e desestacionalización do turismo.
Recoñecemento entre xigantes globais
A peza, producida por Esmerarte, levou o Delfín de Prata na categoría de Produto Turístico. A Deputación de Pontevedra, como entidade local, compartiu recoñecemento no certame con marcas e entidades públicas e privadas de talla internacional como Porsche, UEFA, Emiratos Árabes, L’Oreal ou Booking. O festival de Cannes congregou máis de 900 producións de 52 países distintos.
O presidente da Deputación, Luis López, quen viaxou acompañado pola directora de Turismo Romina Fernández, sintetizou o sentido da campaña ao recoller o premio: “As Rías Baixas deixan a un lado a súa extraordinaria beleza costeira para mirar ao seu interior. Un paraíso composto por 61 concellos nos que perderse e atoparse, nos que desfrutar da natureza e conectar co noso interior”.
A terceira máis premiada da historia
Co galardón de Cannes, a campaña "Cando Volves?" consolídase como a terceira máis premiada da historia do destino Rías Baixas.
As catro distincións internacionais previas foron:
-
Ouro no Japan World´s Tourism Film Festival.
-
Prata no US International Awards de Los Ángeles (Estados Unidos).
-
Prata no International Tourism Festival Africa.
-
Recoñecemento no Terres Travel Festival de Tortosa (Tarragona), logrado este mesmo mes.
A peza audiovisual pon o foco nos lugares, a hospitalidade e o carácter acolledor da xente do interior da provincia, un obxectivo claro da Deputación para amosar o que queda por descubrir na provincia.
