O Programa Galego Municipios Saudables e Sostibles 2000-2025, ideado e fundado polo Prof. Dr. Francisco Peña, culminará a súa traxectoria de 25 anos cun evento de clausura en Santiago de Compostela. Esta iniciativa pioneira, consolidada como un referente na xestión ambiental e a promoción da saúde a nivel local e global, dirá adeus tras un cuarto de século de intensa e frutífera labor. Este evento é un empeño da Consellería de Medio Ambiente e Cambio Climático e da súa conselleira, Ángeles Vázquez, de poñer este broche de ouro a un programa que tanto influíu nos concellos galegos para facelos máis saudables e sostibles, un labor de dar o xusto recoñecemento.
"Non dubidei cando o profesor Francisco Peña me propuxo colaborar coa organización deste Congreso co que se conmemoran 25 anos do Programa Galego Municipios Saudables e Sostibles 2000-2025, recoñecido a nivel internacional e pola propia OMS", di a conselleira na introducción ao programa.
Unha Resposta Local a un Problema Global
Baseado no principio de "pensar globalmente, actuar localmente", o programa naceu no ano 2000 co obxectivo de capacitar os concellos galegos para mellorar a xestión sanitaria do medio ambiente e contribuír ao desenvolvemento sostible. Contou co apoio de figuras destacadas como a Dra. María Neira, da OMS, e recibiu a Presidencia de Honra de S.M. o Rei Felipe VI en varios eventos clave.
A actividade principal do programa foron os Cursos de Saúde Ambiental, que serviron como un foro de debate aberto e plural e permitiron a formación e reciclaxe de 6.717 profesionais e técnicos do sector. Ao longo dos anos, sumáronse á iniciativa 265 concellos de Galicia, León, Asturias e Portugal, o que subliña o seu alcance e impacto. O programa buscou realizar un diagnóstico ambiental para coñecer a situación real de concellos e comarcas, co fin de adoptar medidas correctoras e plans ambientais efectivos.
Un Legado de Coñecemento e Compromiso
A iniciativa, que se desenvolveu navegando a contracorrente en moitas ocasións, mantivo sempre a súa vocación de servizo público e contribuíu a sentar as bases para un futuro sostible en Galicia. O XXV Aniversario culminará cun balance xeral moi positivo e un claro legado: a lección está aprendida. Agora, os concellos galegos terán a responsabilidade de continuar na senda da sostibilidade.
Celebración e Homenaxe
Para conmemorar este fito, celebrarase un evento especial o próximo xoves 30 de outubro de 2025 no Salón dos Tirantes da Cidade da Cultura en Santiago de Compostela. O encontro reunirá a un amplo abano de profesionais e colectivos, entre os que se atopan técnicos e responsables das administracións públicas, profesorado universitario, xestores de empresas, axentes de conservación da natureza, representantes de asociacións ecoloxistas e veciñais, e promotores turísticos.
INSCRIPCIÓNS PARA ASISTENCIA AO EVENTO
O evento contará con varias mesas redondas nas que expertos de recoñecido prestixio, tanto a nivel nacional coma internacional, debaterán sobre os desafíos ambientais do século XXI. Entre os participantes figurarán o Prof. Dr. José Ignacio Elorrieta Pérez de Diego, a Profª Dra. Susana Mónica Marinho Paixão, e o Prof. Dr. Eleuterio Martínez Alcántara.
Na mesa "Ciencia, Empresa e Sociedade", moderada polo Dr. Luis Espada Recarey, abordarase a unidade de acción entre os distintos sectores para a saúde ambiental de Galicia e do planeta. Entre os relatores, destacarán o Prof. Dr. Francisco Javier Sanz Larruga, o presidente da Confederación de Empresarios de Galicia, Juan Manuel Vieites Baptista de Sousa, Julia Melgar, Estanislao Fernández de la Gigoña Núñez e Roberto Ledo Garrido, director do Diario Luso-Galaico, quen representará á Asociación de Periodistas de Galicia. A clausura correrá a cargo de Ángeles Vázquez Mejuto, conselleira de Medio Ambiente e Cambio Climático da Xunta de Galicia.
