O presidente da Deputación de Pontevedra, Luis López, estuda a posta en marcha dun punto de información móbil da Rede Europe Direct que percorrerá os concellos da provincia que se enfrontan ao reto demográfico. O obxectivo é achegar á cidadanía coñecemento sobre a Unión Europea e as oportunidades que ofrece para desenvolver proxectos transformadores nestas áreas con menor poboación.
A proposta xurdiu tras un encontro en Bruxelas entre o presidente provincial, acompañado polo deputado de Fondos Europeos, Javier Tourís, e a xefa adxunta da unidade de Impacto Local, Europe Direct e Redes da Comisión Europea, Ana Juárez, que puxo fin á viaxe institucional. “Foron xornadas moi produtivas, nas que abordamos asuntos de interese para a provincia, especialmente no tocante á xestión de fondos europeos”, valorou Luis López.
A iniciativa do goberno provincial é implantar un punto de información móbil que rote polos concellos catalogados dentro do Reto Demográfico, facilitando información sobre os programas europeos destinados a estas entidades locais e dando a coñecer á veciñanza as oportunidades de mellora en servizos e infraestruturas que promove a UE. “Falamos dunha iniciativa que encaixa na nosa estratexia de goberno, que é achegar a toda a veciñanza, viva onde viva, recursos e servizos do maior interese e calidade”, explicou o presidente sobre esta oficina itinerante, que xa se implementou con anterioridade en Finlandia.
Os centros Europe Direct son puntos de contacto locais que ofrecen información e responden preguntas sobre temas europeos, adaptándose ao contexto local. Contan con persoal cualificado que interactúa cos cidadáns a través de eventos en centros educativos, debates con políticos locais e rexionais, e presentacións en feiras e exposicións. Estes centros reciben máis dun millón de consultas anuais, proporcionando información directa aos responsables políticos europeos sobre as necesidades e preocupacións da cidadanía.
Ao finalizar tres días de reunións e encontros de traballo no Parlamento Europeo, o presidente da Deputación pechou unha viaxe institucional na que formalizou a adhesión do organismo provincial ao padroado da Fundación Galicia Europa e manifestou o apoio do goberno provincial a manter o protagonismo das rexións e entidades locais na xestión dos fondos comunitarios e na redución da burocracia na discusión sobre a regulación do futuro programa de fondos europeos para o período 2028-2034.
Esta cuestión foi abordada por Luis López nun encontro con eurodeputados españois da Comisión de Desenvolvemento Rexional, onde expresou a súa preocupación ante un posible cambio de modelo na xestión dos fondos europeos que restaría peso ás entidades locais en favor dos estados membros. “Somos un goberno municipalista e defendemos a autonomía e a capacidade dos alcaldes e alcaldesas para xestionar os seus recursos”, defendeu o presidente, quen subliñou o “bo funcionamento” deste modelo nos últimos anos, en contraste cos problemas de axilidade na distribución dos fondos Next Generation.
