domingo. 26.06.2022

'Santiago de Compostela no tempo'

A mostra convídanos a descubrir a identidade e herdanza cultural da capital galega a través dunha selección de cen pezas que narran un apaixonante e poliédrico relato sobre a orixe, historia e evolución desta cidade, así como do seu universo de costumes, relacións e vivencias.
A mostra ofrece unha selección de cen pezas que narran un apaixonante e poliédrico relato sobre a orixe, historia e evolución de Santiago.
A mostra ofrece unha selección de cen pezas que narran un apaixonante e poliédrico relato sobre a orixe, historia e evolución de Santiago.

O comisario da exposición «Santiago de Compostela non tempo», Manuel Gago, ofrece mañá ás 19.00 h unha visita guiada de acceso libre e gratuíto ata completar aforo para profundar nesta proposta que albergará a Sede de Afundación en Santiago de Compostela ata o próximo 10 de setembro. Un percorrido guiado que poderá realizarse, así mesmo, tamén con aforo limitado, os próximos xoves 24 e 30 de xuño e o 7, 14 e 21 de xullo.

A mostra convídanos a descubrir a identidade e herdanza cultural da capital galega a través dunha selección de cen pezas que narran un apaixonante e poliédrico relato sobre a orixe, historia e evolución desta cidade, así como do seu universo de costumes, relacións e vivencias.

«Santiago de Compostela no tempo» é a primeira das sete mostras que constitúen o proxecto «Cidades no tempo», unha das principais iniciativas culturais do Xacobeo 2021-2022 e tamén un dos proxectos expositivos máis complexos desenvolvidos en Galicia nos últimos anos. Baixo este nome reúnense sete exposicións, unha por cada unha das principais cidades galegas. Todas reivindican a Galicia urbana. Organizada pola Xunta de Galicia, a través da Fundación Cidade da Cultura, e Afundación, Obra Social ABANCA. Xunto ao comisario, o proxecto contou coa coordinación de Xosé Ramón Lema Bendaña, historiador e antigo Xefe do Negociado de Mantemento de Fondos Bibliográficos na Universidade de Santiago.

A mostra achega obras de arte únicas, incluíndo pezas procedentes do estranxeiro, obxectos históricos icónicos, vídeos, fotografías, gravacións ou documentación antiga que desvela claves sobre a vida desta cidade; pezas, todas elas, que se completan cunha dimensión multimedia e que nos presentan a configuración de Santiago a partir dos seus grandes polos: o Goberno galego, a universidade e a catedral, que fan de Compostela a meta do Camiño e un dos destinos culturais máis relevantes de Europa.

CEN PEZAS, CEN HISTORIAS

«Santiago de Compostela no tempo» ofrécenos a ocasión de contemplar obxectos únicos, a miúdo de difícil accesibilidade para o público, entre os que destaca o Libro de horas de Fernando I (1055), posiblemente, o libro máis antigo conservado en Galicia, custodiado en cámara acoirazada pola Universidade de Santiago e que hai vinte anos que non se expón ao público.

Tamén pertencente a esta institución académica, pódese contemplar a campá da universidade (1600) que, en tempos, funcionou a modo de reloxo da vida estudantil, e que nunha cidade tan rica en arquitectura relixiosa representa unha das poucas campás laicas.

Nas vitrinas atopamos dous relicarios (do séculos XI e XIX), pezas internacionais procedentes de Bélxica, testemuño do traslado dun pequeno fragmento das reliquias do apóstolo a Liexa en 1056. Xunto a elas, un dos obxectos máis representativos das primeiras etapas da ciencia arqueolóxica galega: o baleirado en xeso do petróglifo de Conxo (1935), reprodución realizada por Ramón Sobrino Buhigas.

Ademais, o visitante descubrirá documentos antigos, como planos orixinais de edificios emblemáticos que teñen que ver con ámbitos esenciais para a vida da cidade, como a educación, así como co deseño de servizos como a rede de subministración de auga e luz ou a chegada do tren.

MESAS INTERACTIVAS

A proposta preséntase como unha clara intención de somerxer de pleno ao visitante na cidade a través de dúas mesas interactivas nas que poderán explorar os elementos da exposición e incluso retarse a recoñecer algunhas das imaxes características da estética compostelá, que se presentan no epígrafe Padróns. Ademais, poderase achegar á vida de Santiago a través dos relatos da propia veciñanza.

Xunto ao comisario, o proxecto contou co asesoramento de expertos como Miguel Pazos Otón, doutor en Xeografía; Cristina Sánchez-Carretero, antropóloga e científica titular do Instituto de Ciencias de Patrimonio (Incipit) do CSIC; e Xaquín Núñez Sabarís, doutor en Filoloxía Hispánica.

O colector de «Cultura por alimentos» continúa habilitado na Sede Afundación de Santiago para todas aquelas persoas que desexen contribuír co banco de alimentos local, doando produtos non perecedoiros.

'Santiago de Compostela no tempo'
Comentarios