A Plataforma de Contratación do Sector Público acaba de anunciar a licitación das obras de humanización da contorna da Capela de San Roque, na parroquia de Cabreira, cun orzamento superior aos 553.000,00€. As empresas interesadas teñen de prazo ata o 20 de outubro para presentar as súas ofertas a este proxecto financiado a través do Plan Extra e do Plan +Provincia da Deputación Provincial.
O obxectivo principal da actuación é darlle protagonismo ao peón e mellorar a accesibilidade e o atractivo dunha zona de gran valor patrimonial. Na actualidade, a contorna da capela e do palco da música carece de zonas peonís, presentando un firme bituminoso.
Plataforma única e mobilidade amable
O proxecto afecta a unha lonxitude de 135 metros, cun ancho variable, e propón a eliminación do tráfico rodado na rúa de acceso á capela para convertela nunha plataforma única.
Seguindo os criterios de mobilidade amable e recuperación de espazos públicos, a obra contempla:
-
Ampliación do espazo peonil: Procurarase un ancho mínimo de 2,5 metros para o tránsito de persoas.
-
Pavimentos de calidade: Substituirase o asfalto por unha combinación de lousa de pedra granítica (en cor e con acabado abuxardado) e formigón, priorizando o uso peonil sen impedir o acceso de vehículos aos residentes.
-
Nova iluminación LED: Instalaranse novas luminarias sobre báculo para a iluminación xeral da contorna, ademais de proxectores específicos para resaltar a ermida de San Roque e o palco da música.
-
Renovación de servizos: Realizarase a renovación de tubaxes de saneamento e abastecemento, e procederase ao soterrramento das liñas de telecomunicacións e baixa tensión.
-
Mobiliario Urbano: A actuación complementarase coa colocación de bancos e xardineiras.
Con esta obra, o Concello de Salvaterra de Miño busca contribuír á consecución dos obxectivos fixados na Axenda 2030, no Plan de Acción polo Clima e a Enerxía Sostible (PACES) e no Plan de Mobilidade Sostible do municipio.
