O carrusel infantil enche de maxia o Nadal tudense e premia as compras no comercio local

Unha viaxe chea de fantasía, maxia e ilusión é a que ofrecerá, dende mañá venres, o carrusel infantil instalado na Praza da Inmaculada, un dos puntos neurálxicos do Nadal en Tui. A atracción forma parte da campaña especial de apoio ao comercio local baixo o lema “Este Nadal, merca no comercio local… e viaxa no Carrusel Infantil!”, coa que o Concello busca dinamizar as compras nesta época e encher de vida e encanto as rúas da cidade.

As persoas que realicen compras no pequeno comercio tudense entre o 1 de decembro e o 6 de xaneiro poderán canxear os seus tíckets por unha viaxe gratuíta no carrusel. Ademais, quen non dispoña dun tícket de compra tamén poderá gozar da atracción abonando os 2 euros correspondentes ao prezo do billete.

Deste xeito, cada compra convértese nun pequeno agasallo extra para as familias: unha viaxe entre luces, música e cores que fará as delicias dos máis pequenos.

Desde a Concellería de Comercio e Mercados, destácase que esta iniciativa busca reforzar a importancia do comercio de proximidade. A concelleira de Comercio, Ana Núñez, salienta que coa mensaxe que acompaña a campaña, “Este Nadal, Tui móvese contigo”, preténdese convidar á veciñanza e ás persoas visitantes a apostar polo comercio local ao tempo que participan dun Nadal “cheo de encanto”.

Os establecementos comerciais tudenses poderán recoller dende mañá venres, na Oficina de Turismo, a cartelería da campaña para colocala nos seus locais.