O Goberno galego iniciou xa os preparativos do Xacobeo 2027, co obxectivo de que sexa "a expresión dun proxecto colectivo que ilusionará e implicará a toda a sociedade galega". Así o destacou hoxe o director de Turismo de Galicia, Xosé Merelles, durante a súa intervención nas XX Xornadas Mar por Medio, celebradas en Ribadeo.
Merelles participou na mesa "Facendo Camiño", onde subliñou que o Camiño de Santiago é un factor unificador que "construíu tanto a nivel social ao longo dos séculos, salvando diferenzas xeográficas, lingüísticas e de mentalidade". Por iso, fixo un chamamento a reflexionar sobre o pasado para "ofrecer claves de futuro sobre as que cimentar e facer medrar o noso marco común europeo".
140 millóns de euros para a folla de ruta do 2027
Para acadar os obxectivos de cara ao vindeiro Ano Santo, Turismo de Galicia está a desenvolver o Plan Director dos Camiños de Santiago en Galicia 2022-2027, cun investimento de 140 millóns de euros.
O Plan Director configúrase como "unha ferramenta de xestión e unha folla de ruta" para a conservación e promoción das rutas xacobeas. Merelles destacou que o 45% do orzamento destínase á conservación, mellora, sinalización e mantemento do Camiño e dos albergues públicos.
Entre as actuacións clave do Plan, o director subliñou:
-
Mellora da Seguridade Viaria: Cun gasto de 40 M€ para actuar en máis de 150 quilómetros das rutas.
-
Revalorización patrimonial: Actuacións sobre 10 Bens de Interese Cultural (BICs) situados no Camiño.
"Queremos que quen faga o Camiño en 2027 se atope cunha ruta ambiental, social e economicamente máis sostible, pero tamén innovadora e adaptada ás necesidades da peregrinación actual", asegurou Merelles.
Os preparativos do Xacobeo xa están en marcha
O director confirmou que os preparativos do Ano Santo 2027 iniciáronse este mesmo mes co deseño dunha nova comisión interadministrativa. Este órgano xestor será o encargado de impulsar a participación do sector privado en proxectos relacionados co evento.
As XX Xornadas Mar por Medio, organizadas pola Academia Xacobea, teñen como lema "Ribadeo, encontro de Camiños" e buscan afondar nos valores culturais da peregrinación ata o próximo domingo 21 de setembro.
En canto a datos, Merelles lembrou que máis de 414.000 persoas recolleron a Compostela no que vai de ano, o que supón un incremento do 5% respecto a 2024. As previsións apuntan a que o ano pechará superando o medio millón de camiñantes. Máis de 17.000 deses peregrinos elixiron o Camiño do Norte, que pasa por Ribadeo.
