A Capela da Madanela en Arzúa acollerá, a partir do venres 1 de agosto, a novena edición da exposición 'Bo camiño'. Comisariada por Cristina Carballedo, a mostra forma parte da programación cultural do Concello de Arzúa e busca reflectir a esencia do Camiño de Santiago a través da visión de artistas profesionais galegos.
A exposición, que estará aberta durante todo o mes de agosto, destaca a conexión única entre a arte e o propio espazo histórico da capela, fundada no século XIV polos Agostiños e situada en pleno Camiño Francés. A través de diferentes disciplinas, as obras interpretan as paisaxes, a riqueza patrimonial, as tradicións e a espiritualidade da ruta xacobea.
Na mostra participan artistas de toda Galicia, dende veteranos que levan anos colaborando co proxecto, ata novas promesas que veñen de participar en exposicións como a de Neoterritorios no Museo da Construción Naval de Ferrol. Tamén están presentes artistas que expoñen actualmente na Sexta Bienal Internacional de Gaia e creadores locais que forman parte da iniciativa dende os seus inicios.
Entre as numerosas obras que se poderán ver, atópanse as 'Galleguiñas' de Carmen Alberto, a paisaxe de Antonio Abad e Mila Vázquez, a cerámica de Violeta Bernardo, ou as fotografías de Rosalía Cruz. Tamén destacan as creacións de Lomarti, Xoan Vila, Pedro Rascado, e as acuarelas de Silvatiica e Bea Landeira, entre moitos outros.
A exposición 'Bo camiño' convértese así nunha oportunidade para que peregrinos e visitantes se acheguen á visión artística da ruta, convertendo a histórica capela nun punto de encontro cultural e artístico no corazón do Camiño.
