A Xunta de Galicia e a Universidade de Santiago de Compostela (USC) fixeron este xoves un chamamento conxunto á unidade e ao mantemento do consenso acadado en 2015 por todas as universidades galegas sobre a titulación de Medicina. Nunha comparecencia na que tamén participou o reitor da Universidade de Vigo (UVigo), Manuel Reigosa, alertaron sobre o risco de iniciativas unilaterais que poidan romper este acordo, que consideran beneficioso para o alumnado, a calidade da docencia e o interese xeral de Galicia.
O conselleiro de Educación, Ciencia, Universidades e FP, Román Rodríguez, e o de Sanidade, Antonio Gómez Caamaño, xunto co reitor da USC, Antonio López, e o da UVigo, Manuel Reigosa, trasladaron esta posición tras unha reunión urxente do Consello de Docencia Clínica.
Tanto a Xunta como as universidades de Santiago e Vigo coinciden en que calquera modificación no mapa de titulacións universitarias debe ser abordada de forma conxunta, tal e como se acordou no seu día, e non a través de decisións unilaterais.
Neste sentido, realizaron un chamamento á Universidade da Coruña (UDC) para retomar o diálogo e manter o espírito de cooperación que sempre caracterizou ao Sistema Universitario de Galicia. Anunciaron que se convocarán novas reunións ao longo do mes de xuño co obxectivo de preservar o acordo de 2015.
