A Conselleira de Vivenda e Planificación de Infraestruturas, María Martínez Allegue, reclamou hoxe no Pazo do Hórreo a prórroga dos fondos europeos MRR ao Ministerio de Vivenda e Axenda Urbana, co fin de garantir a execución das promocións de vivenda cooperativa en Galicia.
Loita por Xuxán e Vigo
Durante a súa intervención, a conselleira incidiu na necesidade desta prórroga para salvar proxectos como o de Galivivienda en Xuxán (A Coruña), onde 224 vivendas están en xogo, e o de Vigo, con 27 vivendas previstas que aínda non se iniciaron. Alegue subliñou que estas vivendas non poderán estar listas a tempo "se non se prorrogan os prazos".
A conselleira destacou o papel da Xunta como a "única administración que estivo do lado dos cooperativistas dende o primeiro momento", mantendo un contacto constante coa cooperativa, os socios, o ICO e a ministra de Vivenda. Sinalou que foi grazas á insistencia do Goberno galego que o ICO rectificou as súas condicións de financiamento, que supuñan un incremento inasumible nas cotas para os cooperativistas.
Compromiso da Xunta e crítica ao Ministerio
Allegue detallou os pasos dados pola Xunta dende 2023, cando se adxudicaron as parcelas en Xuxán para vivenda protexida, xestionando 10 M€ en fondos europeos para a promoción. A conselleira calificou de "colmo da demagoxia" a visita do director xeral de Vivenda do Ministerio á Coruña en maio, criticando que non achegou "ningunha solución real".
Asegurou que a Xunta non permitirá que "se desvirtúen os alugueres accesibles e taxados pola normativa autonómica" e advertiu que, de ser o caso, o Goberno galego non dubidará en recuperar o solo público para protexer o interese xeral.
Para rematar, a titular de Vivenda reclamou transparencia ao Goberno central, subliñando que non se coñece cantos préstamos se concederon dos 6.000 millóns anunciados polo ICO, "en Galicia, ningún", afirmou. Tamén convidou aos grupos da oposición a unirse á súa reclamación para asegurar a prórroga dos fondos e así evitar que moitas operacións de vivenda cooperativa queden paralizadas en toda España.
