A patronal galega celebra avances para flexibilizar a normativa e dar aire ao sector pesqueiro

A Comisión Mar-Industria da Confederación de Empresarios de Galicia (CEG) manifestou este domingo a súa satisfacción polas melloras acadadas recentemente para o sector pesqueiro, ao entender que supoñen un paso “cara á flexibilización dunhas normas innecesariamente ríxidas” que, segundo advirten, “poñerían en serio risco a pervivencia do sector pesqueiro galego”.

Desde a patronal sinalan que estas modificacións responden a unha demanda histórica do sector e permiten avanzar nun marco regulatorio máis adaptado á realidade da actividade no mar, evitando —na súa opinión— consecuencias negativas para a frota e para o conxunto da economía vinculada á pesca en Galicia.

A Comisión Mar-Industria da CEG subliña, ademais, que apoia as reivindicacións da Federación Galega de Confrarías de Pescadores, á que considera parte “con todo dereito” da cadea mar-industria galega. “Demóstrase unha vez máis a necesidade de traballar unidos para afrontar problemas comúns”, indican, incidindo na importancia da coordinación entre todos os elos do sector para defender os intereses compartidos.

A organización empresarial insiste en que o diálogo e o traballo conxunto resultan claves para garantir a continuidade da actividade pesqueira e manter o peso estratéxico da cadea mar-industria no tecido produtivo galego.