O Consello Regulador da Denominación de Orixe Ribeiro entregará o vindeiro mércores, 26 de xuño, os XIV Premios D.O. Ribeiro nunha gala que terá lugar no restaurante A Carballeira de Santa Cruz, en Santa Cruz de Arrabaldo. Un evento que, segundo subliñou a presidenta do Consello Regulador, Concha Iglesias, servirá para "celebrar a calidade dos nosos viños e das persoas que o fan posible". Iglesias felicitou a todos os premiados e agradeceu "o seu compromiso coa tradición vitivinícola e os seus esforzos, así como o seu labor de difusión destacando as excelencias do noso produto".
Nesta edición, xa se coñecen algúns dos galardoados que serán recoñecidos polo seu destacado labor e dedicación ao sector.
Galardoados xa anunciados:
- Elisa Collarte, Premio Vida entre Vides: Viticultora e 'colleiteira' de arraigada tradición familiar, Elisa Collarte asumiu as rendas dunha das adegas máis antigas da D.O. Ribeiro en 1989. Comezou cunha hectárea de viñedo propio, que pronto se expandiu a seis hectáreas dedicadas case na súa totalidade a variedades de uva branca autóctonas como Treixadura, Godello, Loureira e Albariño. Collarte manifestou sentirse "moi feliz con este recoñecemento que premia todo o esforzo feito todos estes anos", resaltando a "dureza" dun traballo "que se foi modernizando aos poucos" e destacando o apoio incondicional do seu marido.
- Fundación Expourense, Premio Ribeiro en Nós: Esta distinción, que se entrega por cuarta vez, recae este ano na Fundación de Feiras e Exposicións de Ourense. Expourense, adicada á promoción de actividades industriais e sociais, organiza unha media de 10 feiras anuais que xiran en torno ás potencialidades da provincia, amosando sempre un especial interese pola gastronomía e a viticultura. A súa disposición para acoller salóns como Vinis Terrae ou Xantar, vitrinas para os viños galegos de calidade, foi fundamental para a internacionalización das adegas e a conquista de novos mercados.
- Vinetur, Premio Mellor Tarefa de Comunicación: Fundada hai 16 anos por Emanuel Casais en Vilagarcía de Arousa, Vinetur consolidouse como a revista dixital líder do sector do viño en español. Con máis de sete millóns de usuarios e 12 millóns de visitas constantes, Vinetur ofrece información actualizada sobre viños, enoturismo, actualidade de adegas, economía, agricultura, mercados, márketing, hostalería e gastronomía, entre outros.
Próximos anuncios e Cata Oficial:
Nos vindeiros días, o Consello Regulador dará a coñecer os nomes do Persoeiro de Honra e o Premio Muller e Viño. Ademais, a C.R.D.O. Ribeiro tamén recoñecerá a Mellor Taberna-Bar de Viños, a Mellor Vinoteca–Tenda Especializada e o Mellor Servizo de Viño en Restaurante.
Como xa é tradición, no transcurso da gala entregaranse tamén os premios aos viños gañadores da Cata Oficial, cuxos resultados se desvelarán durante a propia cerimonia, engadindo un elemento de emoción e expectación á velada.
