O presidente da Deputación de Pontevedra, Luis López, subliñou hoxe o “firme compromiso do goberno provincial coa transparencia, rigor, seriedade e a xestión responsable dos recursos” durante a presentación do Congreso polo 40 aniversario do Consello de Contas. No acto, estivo acompañado polo conselleiro maior do Consello de Contas, Juan Carlos Aladro, e polo conselleiro de Corporacións Locais da entidade, Simón Rego.
O congreso, denominado “Congreso 1985-2025. 40 anos de Bases de Réxime Local e do control externo local en Galicia”, reunirá en A Coruña a conferenciantes de primeiro nivel, incluíndo membros de universidades, da OCDE e da Comisión Europea.
Tendendo pontes entre administracións
Durante a presentación, López eloxiou a importancia de “tender pontes” entre as administracións. Neste sentido, destacou a posta en marcha de actividades no Pazo provincial da Deputación xunto co Consello de Contas e tamén con entidades como o Parlamento de Galicia, "recuperando o exercicio de transparencia ao presentar nos últimos dous anos as nosas contas alí”.
O presidente incidiu na importancia de “buscar solucións da man do consenso e da cooperación entre todas as administracións”, e felicitou a Juan Carlos Aladro “pola súa sensibilidade á hora de organizar este congreso”, reafirmando o compromiso da Deputación co Consello de Contas.
Un espazo para o diálogo sobre a xestión pública local
O “Congreso 1985-2025. 40 anos de Bases de Réxime Local e do control externo local en Galicia” terá lugar de xeito totalmente gratuíto no PALEXCO da Coruña os días 15 e 16 de setembro.
O evento será un espazo para o diálogo e a reflexión sobre a xestión dos recursos públicos e sobre cuestións fundamentais como a distribución de competencias, o financiamento da administración local, a xestión colaborativa e o papel dos gobernos intermedios. Tamén se abordarán temas como a transformación da xestión pública local e os retos do control interno e externo na xestión dos recursos.
