Oito centros recoñecidos polas súas accións innovadoras de fomento do uso da lingua galega

DL-G

10 de julio de 2023 (00:40 h.)

A Xunta de Galicia acaba de resolver o programa de Proxectos de innovación educativa en dinamización lingüística correspondentes ao curso 2022/2023, coa selección de oito centros que destacan polas súas propostas innovadoras para o fomento do uso da lingua galega, sobre todo entre a mocidade.

A comisión de selección valorou especialmente os proxectos en función do seu interese educativo, da súa contribución ao incremento do uso da lingua, á eliminación de prexuízos lingüísticos entre a comunidade educativa e á posta en valor do galego como lingua de interese e con proxección de futuro para a mocidade. Así mesmo, tivo en conta as propostas específicas de atención á diversidade e as medidas para fomentar os valores democráticos, en especial a igualdade, entre outros criterios.

Os cinco centros seleccionados como excelentes reciben unha dotación económica de 2.000 euros. Ademais, o profesorado implicado activamente no desenvolvemento de cada un dos proxectos seleccionados recibirá unha certificación de Primeiro Premio de Innovación Educativa, cunha equivalencia de 30 horas de formación do profesorado para a persoa coordinadora e de 20 horas para o profesorado participante. No caso do de Mención de Honra, os docentes participantes no proxecto reciben unha certificación de accésit.

O obxectivo desta iniciativa da Consellería de Cultura, Educación, FP e Universidades é animar o profesorado a desenvolver accións que revertan positivamente na dinámica lingüística habitual do centro escolar e xeren melloras permanentes na práctica docente e na realidade do ensino.

Listaxe de centros

Proxecto	Centro	Concello	Provincia
Musigalíza-te	CPI Plurilingüe Antonio Orza Couto (Premio de Innovación Educativa)	Boqueixón	A Coruña
Rachando roles	CIFP Rodolfo Ucha Piñeiro (Premio de Innovación Educativa)	Ferrol	A Coruña
IES Ricardo Carvalho Calero (Premio de Innovación Educativa)	Ferrol	A Coruña
CEIP A Solaina (Premio de Innovación Educativa)	Narón	A Coruña
Comer e ler en galego	CIFP Paseo das Pontes (Mención de honra)	A Coruña	A Coruña
A literatura galega á escena	IES Martaguisela (Premio de Innovación Educativa)	O Barco de Valdeorras	Ourense
Luces, cámara... A falar!	IES Ramón Cabanillas (Premio de Innovación Educativa)	Cambados	Pontevedra
3, 2, 1... Acción!	CEIP Plurilingüe de Reboreda (Premio de Innovación Educativa)	Redondela	Pontevedra

Etiquetas