A Xunta reforza o teatro afeccionado galego con 55.000 euros para impulsar 84 funcións e novos proxectos culturais

A Xunta de Galicia destinará este ano 55.000 euros á Federación Galega de Teatro Afeccionado (Fegatea) para apoiar o desenvolvemento da súa programación cultural ao longo de 2026, que incluirá 84 representacións escénicas por toda Galicia, a organización do Festival Agustín Magán e un novo certame de microteatro con motivo do 26 aniversario da entidade.

O convenio foi asinado este martes polo conselleiro de Cultura, Lingua e Xuventude, José López Campos, e pola presidenta de Fegatea, Chelo Pampillón, consolidando así o incremento progresivo do apoio autonómico ao teatro amador galego.

Durante o acto, López Campos destacou que este acordo “supón consolidar o investimento que vimos facendo nos últimos anos”, lembrando que a achega da Xunta pasou dos 30.000 euros en 2021 aos 55.000 actuais. O responsable autonómico subliñou ademais o compromiso do Goberno galego con “dar impulso e visibilidade a esta dramaturxia que move a máis de 6.000 espectadores”.

O conselleiro puxo en valor o papel da Federación Galega de Teatro Afeccionado como “a maior estrutura teatral organizada en Galicia”, sinalando que agrupa actualmente 60 colectivos das catro provincias galegas e mobiliza preto de 800 persoas vinculadas á actividade escénica.

Entre as iniciativas destacadas figura o Circuíto Galego de Teatro Amador, unha rede de representacións que o pasado ano permitiu desenvolver preto de 170 actuacións e achegar o teatro a numerosos concellos sen programación estable.

Así mesmo, o financiamento permitirá celebrar unha nova edición do Festival de Teatro Amador Agustín Magán, que se desenvolve en distintos espazos culturais de Santiago de Compostela, incluído o Salón Teatro, sede do Centro Dramático Galego.

Como novidade, Fegatea organizará este verán unha xornada especial de microteatro na Cidade da Cultura para conmemorar o seu 26 aniversario. O evento, previsto para xullo, incluirá oito representacións nunha aposta por amosar a creatividade e a vitalidade do teatro afeccionado galego.

López Campos destacou tamén o valor social e cultural do teatro amador “na liña da pioneira Lei de cultura inclusiva e accesible de Galicia”, ademais do seu impacto económico e dinamizador en todo o territorio galego.