O Centro Dramático Galego estrea dúas novas coproducións con compañías galegas e portuguesas

O Centro Dramático Galego reforza esta semana a súa actividade escénica coa estrea de dúas novas coproducións que consolidan a aposta da Xunta pola creación teatral galega e pola cooperación cultural con Portugal. Trátase de Somos os monstros, que poderá verse no Salón Teatro de Santiago de Compostela do 22 ao 24 de maio, e A Fortaleza, que se estreará no Teatro Municipal de Matosinhos Constantino Nery dentro da programación do Festival Internacional de Teatro de Expressão Ibérica (FITEI) do Porto.

Con estes dous novos espectáculos, o Centro Dramático Galego dálle continuidade á súa liña coproductora iniciada este ano con Black Box. Unha saga épica, de Hugo Torres, presentada recentemente como peche do festival Escenas do cambio. A unidade teatral da Xunta afonda así na colaboración con estruturas escénicas portuguesas e no apoio aos procesos creativos impulsados por compañías e artistas de Galicia.

A primeira das propostas, Somos os monstros, é unha coprodución entre o Centro Dramático Galego, a compañía galega Berrobambán e as portuguesas Terra Amarela e Comédias do Minho. A montaxe parte do texto homónimo de Paula Carballeira, Premio Nacional de Literatura Dramática 2023, co que obtivo tamén o X Premio Manuel María de Literatura Dramática Infantil convocado pola Consellería de Cultura, Lingua e Xuventude a través da Axencia Galega das Industrias Culturais.

Dirixida por Magda Labarga, a obra sitúase nun bosque queimado e entre casas en ruínas, onde dous irmáns saen xogar ao solpor, pérdense e descobren que nas sombras habitan os monstros. Pensada para público a partir dos 12 anos, a montaxe destaca polo seu carácter inclusivo e accesible, cun elenco diverso no que conviven distintas identidades, linguas e corporalidades.

En escena empréganse galego, portugués, lingua de signos española e lingua xestual portuguesa, ademais de audiodescrición poética, sobretítulos adaptados e visitas táctiles previas ás funcións para persoas con discapacidade visual. O reparto está integrado por Manu Estévez, Areta Bolado, Emma Vallejo, Juliana Campos e Tony Weaver. A proposta conta tamén coa colaboración do Concello de Ponteareas, onde se desenvolveu unha residencia artística do programa ArtisTea.

Somos os monstros ofrecerá funcións no Salón Teatro compostelán os días 22, 23 e 24 de maio ás 18.00 horas, con entradas dispoñibles a través da plataforma Ataquilla e na billeteira física da rúa Nova.

Pola súa banda, A Fortaleza chega como unha coprodución do Centro Dramático Galego co FITEI e a compañía galega A Feroz. A creación de Raquel S. toma como punto de partida a figura da guerrilleira Consuelo Rodríguez López, coñecida como Chelo, para reflexionar sobre as pegadas invisibles da loita, as herdanzas que permanecen no tempo e as violencias íntimas e colectivas que atravesan as persoas antes de que estoupe unha guerra.

O espectáculo bebe da investigación realizada por Aurora Marco, autora de Mulleres na guerrilla antifranquista galega, quen comparte escena con Bea Romero, Gustavo Freire, Lorena Conde, Inés Salvado Gontad e Mariana Leite Soares. A proposta combina teatro, memoria histórica, investigación e acción performativa.

Con texto de Raquel S. e Lorena Conde, a montaxe conta con iluminación de Raul Giraldo, son de Mariana Leite Soares, escenografía de Cristóvão Neto e vestiario de A Feroz. A Fortaleza poderá verse no Teatro de Matosinhos o venres 22 ás 19.00 horas e o sábado 23 ás 21.30 horas, dentro da programación oficial do FITEI.