Tui presenta a UNICEF a súa candidatura para ser recoñecida como Cidade Amiga da Infancia

;O Concello de Tui deu un paso crucial no seu obxectivo de converterse en Cidade Amiga da Infancia, un recoñecemento impulsado por UNICEF España para asegurar que os dereitos de nenos, nenas e adolescentes sexan unha prioridade nas políticas locais. A candidatura formal xa foi remitida a UNICEF España tras recibir o apoio unánime do Pleno da Corporación Municipal, un requisito indispensable para optar a este prestixioso selo. Este acordo institucional reflicte un compromiso claro co impulso de políticas que favorezan o benestar, a participación e o desenvolvemento integral da mocidade tudense.

Será no mes de xullo cando se faga público se Tui figura entre os municipios seleccionados na primeira fase. En caso afirmativo, o Concello continuará coa elaboración dun diagnóstico exhaustivo sobre a situación da infancia e adolescencia na cidade, así como co deseño do Plan Local de Infancia e Adolescencia. Estes traballos xa están en marcha, como parte do proceso esixido para acadar o recoñecemento definitivo, previsto para finais de ano.

Tui xa conta, dende 2023, cunha estrutura estable de participación infantil e adolescente: o grupo ParTUIcipando. Este foro reúne periodicamente a nenos, nenas e mozos do municipio, manténdose aberto a novas incorporacións e funcionando como unha canle directa para escoitar as súas propostas e inquedanzas. Representantes deste grupo tamén participan activamente no Consello Autonómico de Infancia e Adolescencia de Galicia, fortalecendo o seu papel representativo. Ademais, o Concello celebra de forma regular plenos infantís e xuvenís, ofrecendo á infancia a oportunidade de trasladar directamente ao goberno local as súas opinións, preocupacións e suxestións.

A concelleira de Ensino, Cultura e Mocidade, Sonsoles Vicente Solla, subliñou o firme compromiso do concello: “Tui leva tempo traballando nunha liña clara: garantir espazos reais de participación infantil e integrar a mirada dos máis novos nas decisións municipais. Queremos ser unha cidade que escoita, que respecta e que actúa coa infancia no centro”.

A iniciativa Cidade Amiga da Infancia, promovida por UNICEF en colaboración co Ministerio de Mocidade e Infancia, a FEMP e outros organismos especializados, recoñece aos municipios que promoven contornos seguros, saudables, participativos e inclusivos para a infancia e adolescencia. Tui agarda con ilusión o veredicto de UNICEF en xullo, confiando en que o seu traballo e compromiso sexan recoñecidos.