O Porriño acolle a fin de semana grande das Festas do Cristo 2025, con catro días repletos de actividades para todos os públicos e nos que a música será a gran protagonista. O programa inclúe dous festivais, verbenas e unha variada oferta cultural e de lecer.
O Louro Valley Festival, con entrada de balde, arrincará mañá venres no aparcadoiro da rúa Progreso. O cartel liderado por Beret subirá ao escenario ás 22:45 horas, tras a actuación de Shameless. A noite continuará con Heredeiros da Crus e os DJs Pitty, Samu Pexe e Khris Guez.
Ademais, este ano nace o Dabuten! Remember, pensado para outro tipo de público, que trae na súa estrea ao icónico DJ e produtor Sash!, quen pinchará a partir da medianoite. Antes, actuarán Dmirón e Traffic House e a noite pecharase con Groove Amigos e Michi.
O alcalde, Alejandro Lorenzo, destacou que "ambos festivais son un claro exemplo do compromiso do Concello para apoiar a cultura local á vez que atrae grandes nomes do panorama musical nacional e internacional, enchendo de vida o noso municipio".
Un programa cheo de música, tradición e inclusión
O venres comezará cunha actuación sorpresa na Praza Arquitecto Antonio Palacios ás 19:00 horas. O día completarase cun concerto de Xoana no Parque do Cristo e a primeira das sete verbenas, a cargo da Orquestra Tango.
O sábado, o acto central será a lectura do pregón ás 13:00 horas na Praza Arquitecto Antonio Palacios, a cargo do equipo feminino do Club Balonmán Porriño, subcampión de Europa. A xornada incluirá animación de rúa con batucadas e a música das bandas musicais, rematando a noite coa verbena da Orquestra Ritmo Joven.
O domingo estará marcado polos actos relixiosos, coa misa solemne e procesión do Santísimo Cristo da Agonía, acompañada pola Banda de Guerra da Brilat. Pola tarde, os máis pequenos poderán gozar do espectáculo de Cantajuego “Coco y Pepe”. A noite contará coas orquestras Galilea e América.
O luns, festividade local, terá lugar a tradicional misa de campaña e a música da Banda de Música Municipal de Redondela. O broche de ouro da noite será a dobre verbena coas orquestras París de Noia e Panorama.
Ademais, as festas destacan pola súa aposta pola inclusión. Nos concertos de Beret e na sesión de DJs haberá intérpretes de lingua de signos e mochilas vibratorias para que as persoas con discapacidade auditiva poidan gozar da música. A lectura do pregón e o espectáculo de Cantajuegos tamén contarán con interpretación en lingua de signos.
