A proposta 'Marxes Líquidas', do equipo formado por María Fandiño Iglesias e Miriam García, é a gañadora do concurso de ideas de Reordenación da Fronte Fluvial do río Miño en Tui, convocado polo Concello de Tui en colaboración co COAG, o Colexio Oficial de Arquitectos de Galicia. O premio está dotado con 18 mil euros.
Hoxe venres, 7 de xaneiro, ás 20 h, na Sala Municipal de Exposicións na Área Panorámica, terá lugar a entrega de premios do concurso. O acto contará coa presenza do alcalde de Tui, Enrique Cabaleiro, membros da corporación municipal, do COAG, e dos autores das 22 proposta presentadas ao concurso. Até o próximo xoves día 13 poderá visitarse na Sala Municipal a mostra das propostas presentadas ao certame.
O xurado estivo presidido polo alcalde de Tui, Enrique
Cabaleiro González, e formaron parte do mesmo Manuel González Sarria, conselleiro
técnico da Confederación Hidrógráfica del Miño -Sil; Antonio Iglesias Magán, enxeñeiro
de Camiños, Canles e Portos, e xefe do servizo de Proxectos e Obras do Servizo
Provincial de Costas de Pontevedra; Belén Suárez Massó, arquitecta
representante da Consellería de Cultura e Turismo da Xunta de Galicia; Sara
Piñón Esteban, arquitecta adscrita ao servizo de Arquitectura da Deputación
Provincial de Pontevedra; Susana Rivadulla López, xefa do servizo provincial de
Urbanismo en Pontevedra, representante da Consellería de Medio Ambiente,
Territorio e Vivenda; Elizabeth Abalo Díaz e Gonzalo Alonso Núñez, arquitectos
representantes do Colexio de Arquitectos de Galicia; Juan José Vázquez Cerreda,
enxeñeiro representante do Colexio de Enxeñeiros de Camiños, Canles e Portos de
Galicia; e os arquitectos Javier Antoñón Clemente e Pablo Rivas Caride do
Concello de Tui.
Para outorgar o primeiro premio a “Marxes
líquidas” o xurado valorou positivamente o plantexamento de “proxecto
estratéxico” que realiza “complementado con propostas arquitectónicas
desenvolvidas de forma solvente”. Indican que se trata dunha proposta “sensible
e reflexionada en relación ao ámbito no que está e o que iso implica”. Tivo en conta tamén a incorporación da auga
coma elemento, e o sentido realista que recolle ao propor “menos construcións
ou intervencións que outras propostas”. Outros aspectos destacados polo xurado son
que ten en conta a dinámica fluvial comas cheas do río, e que xustifica as
distintas actuacións en zonas verdes propostas diferenciándolas ao longo do ámbito
de traballo.
Segundo recollen as autoras no
proxecto a proposta buscan enfatizar a relación da cidade co río. A actuación proposta
vai dende a vella Ponte Internacional até os xardíns de Troncoso “concentrándose moi especialmente na
beira, nos seus espazos e hábitas, e o seu cosido co tecido e os equipamentos
existentes”.
Amais xurado
acordou conceder un primeiro accésit, dotado con 8.500 €, á proposta “Desde la
memoria al medioambiente” realizado por Luciano González Alfaya e Patricia
Muñiz Núñez do Estudio MMASA Muñiz Mas Alfaya, SLP. Un segundo accésit, de 3.500 €, foi
concedido a “Tui…de salones y balcones” de Cristina García Fontán e Óscar López
Alba. Amais outorgáronse dúas mencións honoríficas ás propostas presentadas
baixo os lemas “Raia 984” e “Re-habitar paisajes”.