A Asociación de Balnearios de Galicia celebra o seu 40 aniversario cun acto institucional e unha homenaxe ao doutor Juan Gestal
A Asociación de Balnearios de Galicia celebrou esta mañá o acto central do seu 40 aniversario na Facultade de Medicina da Universidade de Santiago de Compostela, nun evento no que participaron representantes institucionais, profesionais da saúde, do turismo e do sector termal galego e portugués. A cita contou coa presenza do conselleiro de Sanidade, Antonio Gómez Caamaño; o presidente do Parlamento de Galicia, Miguel Santalices; a presidenta da Asociación, María Soledad Espiño; o director da Axencia de Turismo de Galicia, Xosé Manuel Merelles; e o decano da Facultade de Medicina, José Carreira.
Durante o encontro estiveron presentes representantes de numerosos balnearios galegos, e incluíu unha conferencia do secretario xeral de Termas de Portugal, João Pinto, sobre o futuro do termalismo, así como unha mesa redonda con expertos vencellados á saúde, á minería e ás políticas sociais: a catedrática e especialista en hidroloxía médica Rosa Meijide; o enxeñeiro de Minas Luis García; e o técnico do Sergas Eduardo González.
O valor do termalismo galego e os retos do sector
No seu discurso, a presidenta da Asociación, María Soledad Espiño, destacou que o “renacemento e popularización do termalismo galego” radica na calidade e diversidade das augas mineromedicinais de Galicia, na modernización das instalacións e na seguridade que ofrece unha estrita normativa. Subliñou tamén que o termalismo galego constitúe “un sector industrial cunha clara vocación de futuro”.
A inclusión da balneoterapia na carteira de servizos do sistema público de saúde segue a ser un dos grandes obxectivos da entidade. Espiño lembrou que esta medida achegaría beneficios ao conxunto da sociedade: menores gastos sanitarios, mellor calidade de vida para pacientes con enfermidades crónicas ou en rehabilitación, impulso para os establecementos termais e un impacto dinamizador nos territorios onde se localizan. “A OMS recoñece o uso das augas mineromedicinais como terapia médica desde 1986”, recordou.
Entre os retos de futuro, os expertos sinalaron o envellecemento da poboación —que abre novas oportunidades para a prevención e o envellecemento saudable—, a crecente demanda de servizos vinculados á saúde mental e a revolución tecnolóxica que está transformando a atención personalizada grazas á intelixencia artificial. “Os novos usuarios buscan experiencias a medida, resultados medibles e programas individualizados, algo que hoxe xa é posible grazas á tecnoloxía”, concluíron.
Cooperación Galicia–Norte de Portugal
O acto puxo tamén o foco na colaboración transfronteiriza. O secretario xeral de Termas de Portugal, João Pinto, destacou que Galicia e o norte de Portugal teñen a oportunidade de crear “un ecosistema de innovación en saúde e benestar” a partir dos seus recursos termais, da investigación científica conxunta e da formación especializada. Unha alianza que, ao seu xuízo, pode converter a eurorrexión nun referente europeo en saúde preventiva, calidade de vida e desenvolvemento sustentable.
Homenaxe ao doutor Juan Gestal: un referente da saúde pública
O evento incluíu a entrega da Medalla da Asociación ao doutor Juan Gestal, director da Cátedra de Hidroloxía Médica USC–Balnearios de Galicia, en recoñecemento á súa traxectoria e ao impulso que deu á balneoterapia como ferramenta de saúde pública. Espiño definiuno como “un defensor incansable dos beneficios terapéuticos das augas mineromedicinais”.
No seu discurso de agradecemento, Gestal recordou ao doutor Luís Rodríguez Míguez, falecido hai unha década, impulsor da creación da Cátedra, e agradeceu a colaboración dos directores médicos e propietarios dos balnearios galegos.
O presidente do Parlamento, Miguel Santalices, encargado de pronunciar a laudatio, definiu a Gestal como “un referente mundial en saúde pública” e mesmo “un destacado influencer” polo seu labor divulgador. Pola súa banda, o conselleiro de Sanidade, Antonio Gómez Caamaño, salientou a extensa traxectoria profesional e académica do galardoado, lembrando o seu papel como director xeral de Saúde Pública, académico numerario das Reais Academias de Medicina e Farmacia, profesor emérito da USC e director da Cátedra de Hidroloxía Médica.
Turismo de Galicia reivindica o potencial termal da comunidade
O director da Axencia de Turismo de Galicia, Xosé Merelles, destacou a importancia do termalismo na oferta turística galega. Galicia é a segunda comunidade europea en número de mananciais —máis de 300— e posúe sete das oito tipoloxías de augas mineromedicinais recoñecidas.
Merelles lembrou que a Xunta está a impulsar o sector mediante o Plan de Turismo Termal 2025–2028, dotado con 10 millóns de euros, así como a través de distintas liñas de axuda para a creación de novos proxectos e a rehabilitación de instalacións. Reivindicou tamén o papel da Cátedra de Hidroloxía Médica, dirixida polo doutor Gestal, como espazo de formación e investigación ao servizo dun recurso estratéxico para Galicia.