A Deputación de Pontevedra impulsa o enoturismo como panca para a internacionalización e desestacionalización das Rías Baixas

O presidente da Deputación de Pontevedra, Luis López, salientou este xoves a "valiosa oportunidade" que representa o enoturismo para consolidar a estratexia provincial de "internacionalización, desestacionalización e descentralización do destino turístico Rías Baixas". Así o afirmou durante o Encontro Nacional sobre Enoturismo, organizado por Segittur (Sociedade Mercantil Estatal para a Xestión da Innovación e as Tecnoloxías Turísticas) na adega Lagar de Pintos, en Ribadumia.

No evento, que contou tamén coa participación da deputada de Turismo, Nava Castro, e a directora de Turismo da Deputación, Romina Fernández, o presidente provincial clausurou a xornada subliñando que a estratexia da Deputación pasa por "promocionar as riquezas e atractivos dos 61 concellos da provincia, que teñen, de norte a sur e desde a costa ao interior, no enoturismo unha das súas grandes bazas".

Creación dun grupo de traballo para o enoturismo intelixente

Un dos fitos do encontro foi a formalización da creación dun grupo de traballo relacionado co enoturismo intelixente. Esta iniciativa buscará unha xestión sustentable e baseada en datos do sector, abordando desafíos como a diversificación da oferta, a cooperación entre os distintos destinos enoturísticos nacionais, o impulso da dixitalización e a potenciación da actividade económica a través dun mellor coñecemento do mercado.

A xornada incluíu tamén unha radiografía actual do enoturismo en España, o estudo dun caso de uso, unha mesa redonda sobre como pasar da teoría á acción e unha conferencia sobre o modelo ontolóxico aplicado a este sector.

O enoturismo: un dos cinco produtos turísticos clave para as Rías Baixas

A deputada Nava Castro deu a benvida aos máis de trinta representantes do sector, destacando que "o enoturismo é un dos valores en alza do turismo nas Rías Baixas". Engadiu que se está a traballar para "poñer en valor conxuntamente os nosos excelentes e recoñecidos viños e o seu aproveitamento como recurso turístico".

Romina Fernández, directora de Turismo, profundizou nesta idea, sinalando que na nova estratexia de turismo da Deputación, "o enoturismo foi sinalado entre os cinco produtos turísticos máis importantes polo sector e a nosa denominación de orixe Rías Baixas, como unha das nosas fortalezas". Pola súa banda, o presidente de Segittur, Enrique Martínez, resaltou que entre as accións do novo grupo de traballo estarán a identificación de fontes de datos e a estandarización dunha metodoloxía de recollida de datos.

As Rías Baixas: un paraíso enolóxico e cultural

Luis López remarcou o carácter estratéxico do enoturismo para a Deputación, e non é casualidade a celebración deste encontro nas Rías Baixas. "Escoller esta provincia para a organización dun encontro nacional sobre enoturismo non é arbitrario. Somos un territorio que produce un viño de gran calidade e prestixio, que ve no sector vitivinícola unha fortaleza para impulsar a economía e, por excelencia, un territorio acolledor, atractivo e amigo do turista", recalcou o presidente.

Para un destino que "cada ano recibe un maior número de visitantes", o enoturismo estase a converter nun dos seus maiores atractivos. López describiu as Rías Baixas como "un paraíso natural, un paraíso cultural e, por suposto, un paraíso gastronómico e enolóxico", deseñado para ofrecer un "amplísimo catálogo de experiencias de calidade que xiran arredor do enoturismo". Entre as propostas mencionou a Ruta do Viño Rías Baixas, catas no Castelo de Soutomaior, concertos ao aire libre con degustación de viños ou festas de interese internacional coma a Festa do Albariño de Cambados.

Todas estas iniciativas comparten o obxectivo de descentralizar e desestacionalizar o turismo, distribuíndo as visitas por todos os concellos da provincia ao longo de todas as estacións do ano. "A sustentabilidade do noso medio natural e asegurar a calidade de vida da nosa poboación marcan o noso rumbo", concluíu Luis López, quen reiterou o agradecemento a Segittur e á adega Lagar de Pintos, e reafirmou o compromiso da Deputación co sector do enoturismo. "Convidamos a todo o mundo a descubrir os tesouros das Rías Baixas, un deles sérvese en copas de cristal", finalizou.