O Porriño celebra o crecemento e compromiso de Zelnova Zeltia

O alcalde do Porriño, Alejandro Lorenzo, acompañado polo tenente de alcalde e a concelleira de Sanidade, visitou esta mañá as instalacións de Zelnova Zeltia, empresa líder na fabricación de produtos para o fogar a nivel europeo. Durante a visita, o rexedor destacou a importancia estratéxica da compañía para o tecido industrial do municipio, eloxiando a súa aposta pola innovación, a sustentabilidade e o seu compromiso coas raíces locais.

O presidente de Zelnova Zeltia, Pedro Fernández Puentes, explicou o modelo de expansión sostida da empresa, baseado na innovación, o compromiso ambiental e a internacionalización, subliñando a importancia de manter as operacións no Porriño para xerar emprego e valor na contorna. A compañía, con máis de 80 anos de historia e unha facturación anual de 85 millóns de euros, ten unha forte presenza internacional e mantén as súas fábricas e laboratorios en España.

Alejandro Lorenzo puido coñecer os logros da empresa en innovación e sustentabilidade, sendo pioneira en produtos como o primeiro insecticida en aerosol en España e o primeiro ambientador eléctrico mundial, ademais do seu compromiso ambiental de décadas. O Concello reiterou o seu apoio ás empresas que apostan polo desenvolvemento sostible e a proxección internacional desde O Porriño, considerando o éxito de Zelnova Zeltia un reflexo do potencial industrial e humano da localidade.