A Fundación Juana de Vega continúa, unha edición máis, colaborando co tecido emprendedor para “tecer o futuro da Galicia rural”, tal e como destaca o lema do Programa de Apoio a Empresas Agroalimentarias, que no vindeiro ano cumprirá catorce edicións en activo converténdose na única iniciativa destas características existente en Galicia.
O último día para presentar candidaturas é este venres, 5 de decembro, a través do formulario dispoñible na web oficial: programadeapoyo.juanadevega.org, onde tamén se poden consultar as bases completas da convocatoria.

Desde a súa creación en 2012, a Fundación impulsou o programa con fondos propios e acompañou xa a arredor de 130 proxectos beneficiarios repartidos por toda a comunidade. O presidente da entidade, Enrique Sáez Ponte, lembra que “o apoio aos emprendedores e empresas rurais é unha tarefa central para a Fundación Juana de Vega. Son axentes dinámicos da sociedade civil que crean riqueza vinculada ao territorio. Eles aprenden aquí a consolidar e facer crecer os seus proxectos e nós aprendemos deles novas oportunidades de mellora do noso mundo rural”.

Aberto a proxectos agroalimentarios, forestais, pesqueiros e de base tecnolóxica

O Programa de Apoio está dirixido a iniciativas vinculadas ao sector agroalimentario –incluíndo produción, transformación e comercialización–, ao ámbito forestal, á bioeconomía, á planta ornamental, así como a proxectos marisqueiros e pesqueiros ou de base tecnolóxica e servizos complementarios.
Todos eles deben estar localizados en Galicia e contribuír á posta en valor dos recursos do territorio.

Dúas modalidades para impulsar novas empresas e fortalecer as xa existentes

O programa estrutúrase en dúas modalidades diferenciadas para adaptarse ás necesidades de cada iniciativa:

1. Modalidade Emprendemento

Dirixida á creación de novas empresas, sucesións ou á recuperación de negocios familiares. O seu obxectivo é acompañar aos promotores na transformación das súas ideas en modelos empresariais viables, reducindo os riscos inherentes ao inicio de actividade.

2. Modalidade Crecemento e Consolidación

Enfocada en empresas xa constituídas —autónomos, micropemes e pemes— que precisen apoio para mellorar o funcionamento do seu negocio.
Acompaña procesos como:

• control e análise da xestión

• estudos económicos e financeiros

• organización interna

• investigación de mercados

• estratexia comercial e venda online

• comunicación e márketing

• entre outras áreas clave para o impulso empresarial

12 beneficiarios e ata 75 horas de formación e titorización

A elección dos 12 proxectos beneficiarios (ata seis por cada modalidade) realizarase no mes de xaneiro de 2026.
Ao longo de todo o ano seguinte, as persoas seleccionadas completarán diferentes fases formativas e de acompañamento, cun total de:

• 50 horas de formación técnica

• 25 horas de titorías personalizadas, adaptadas ás necesidades de cada proxecto

Un apoio integral que busca favorecer a profesionalización, competitividade e sustentabilidade do tecido empresarial das zonas rurais galegas.