Medio Rural promete máis controis ante Mercosur e unha ofensiva de promoción dos produtos galegos
A conselleira do Medio Rural, María José Gómez, comprometeuse este mércores a incrementar os controis sobre as importacións vinculadas ao acordo entre a Unión Europea e Mercosur e a esixir que calquera produto que entre en España cumpra os mesmos requisitos sanitarios que xa se aplican aos produtores comunitarios. Ademais, avanzou que a Xunta deseñará unha estratexia para reforzar a promoción dos produtos galegos, especialmente os de calidade diferenciada, e que para iso convocará representantes da distribución, ao considerar este elo “esencial” na cadea de valor.
As declaracións producíronse nunha reunión en Ourense con representantes da Asociación do Sector Primario de Galicia, na que tamén participou o delegado territorial da Xunta na provincia, Manuel Pardo. O encontro enmárcase na rolda de contactos permanentes co sector e dá continuidade ao xa celebrado co mesmo colectivo o pasado 5 de xaneiro.
Escoita ao sector e máis inspeccións en fronteira
No marco das demandas do sector, Gómez insistiu en reclamar que a reciprocidade sanitaria e de garantías se traduza en máis inspeccións en fronteira, unha competencia que, segundo remarcou, corresponde ao Goberno central. No mesmo sentido, subliñou a necesidade de incluír e asegurar cláusulas de salvagarda no acordo, para poder activar mecanismos de protección se se producen desequilibrios no mercado.
A axenda institucional continuará coa vista posta en Mercosur e nas consecuencias para o agro galego: mañá está prevista outra xuntanza con gandeiros en Lugo e o venres celebrarase a primeira reunión da comisión de traballo sobre a futura PAC no seo do Consello Agrario, na que tamén se abordará este asunto.
PAC post 2028: alerta polo recorte de fondos
No capítulo comunitario, a conselleira apoiou a simplificación e redución de burocracia na Política Agraria Común, pero advertiu de que a proposta da Comisión Europea para a PAC post 2028 “non é boa” para o sector galego ao implicar recorte de fondos e a posible perda dos dous piares actuais (axudas directas e desenvolvemento rural). A Xunta, dixo, manterá esta postura ante o Ministerio e en Bruxelas, e será o tema principal do Consello Agrario do venres.
Sanidade animal: mensaxe de tranquilidade pola DNC
En materia de sanidade gandeira, Gómez reafirmou o compromiso de manter o estatus sanitario da cabana galega e lanzou unha mensaxe de tranquilidade en relación coa dermatose nodular contaxiosa (DNC), lembrando que en España os focos se sitúan en Girona. Tamén pediu ao Ministerio máis coordinación estatal e medidas harmonizadas, así como avanzar nunha vacina “marcada”, revisar a catalogación da enfermidade e prever indemnizacións adecuadas se houbese afectados.