A Deputación de Pontevedra reivindica un galego de unidade e futuro na presentación do documental "Mozas da miña aldea"
O presidente da Deputación de Pontevedra, Luis López, reafirmou este luns o compromiso do organismo provincial coa promoción e protección da lingua galega, defendendo un uso "positivo, desde a unidade e con visión de futuro". As súas declaracións tiveron lugar no acto de conmemoración do Día das Letras Galegas, celebrado no Pazo provincial, onde se presentou a primeira parte do documental “Mozas da miña aldea”.
Este proxecto audiovisual, estruturado en cinco episodios, é a contribución da Deputación á homenaxe á poesía popular oral, á que a Real Academia Galega dedica este ano o Día das Letras. O documental dá voz a investigadores da música tradicional galega e ás mulleres que transmitiron oralmente a riqueza da poesía e a música popular na provincia de Pontevedra.
O acto contou coa presenza de todas as persoas que fixeron posible o documental, así como representantes de entidades de normalización lingüística. O deputado de Cultura, Jorge Cubela, deu a benvida á xornada festiva, subliñando o traballo diario da Deputación para que "a nosa cultura se recoñeza, se respecte e se proxecte con orgullo dentro e fóra do noso país".
A estrea deste primeiro capítulo estivo dedicado ás cantareiras dos Seráns de Toutón, en Mondariz, un grupo de mozas que realizaban xuntanzas festivas para cantar e bailar. Luis Prego, coordinador xeral do proxecto, destacou a relevancia destas e doutras cantareiras na tradición oral da provincia.
A celebración incluíu as actuacións das Pandereteiras de Sadeo e as de Su Garrido e Marco Maril, así como a entrega dun agasallo ás pandereteiras de Toutón. Tras este momento, o presidente Luis López remarcou: “Hoxe non conmemoramos o día das Letras Galegas –iso será o 17—. Hoxe é o día do galego, igual que mañá e pasado, e todos os días”.
Con esta iniciativa, a Deputación de Pontevedra non só se suma á celebración do Día das Letras, senón que tamén pon en valor o patrimonio inmaterial da provincia e o papel fundamental das mulleres na transmisión da cultura popular galega.