A Deputación de Pontevedra conmemora o 25N cun acto institucional e a estrea dunha campaña centrada nos micromachismos cotiáns

A Deputación de Pontevedra celebrará este martes 25 de novembro o Día Internacional para a Eliminación da Violencia contra as Mulleres cun acto institucional no Pazo provincial a partir das 11:00 horas, un encontro que se enmarca na campaña deste ano: “O machismo vese claro cando enfocas. E ti, velo?”. Ademais, tanto o Pazo provincial como a sede da institución en Vigo permanecerán iluminados de morado desde a noite do luns e ata a mañá do martes como xesto simbólico de reivindicación e compromiso fronte a unha das formas máis persistentes de violación dos dereitos humanos.

Lectura de manifesto e intervención institucional

O acto contará coa intervención da presidenta en funcións da Deputación, Luisa Sánchez, e incluirá a lectura dun manifesto a cargo de María Jesús Pires Juncal, responsable de violencia de xénero da Unidade da Policía Adscrita ao Corpo Nacional de Policía. Coa lectura preténdese reforzar a necesidade de continuar avanzando na prevención, detección e erradicación da violencia machista en todas as súas manifestacións.

Estrea do anuncio da campaña 25N

A xornada rematará coa estrea do anuncio institucional deseñado pola Deputación para este 25N, un audiovisual que pon o foco nos comportamentos machistas normalizados e instalados na vida diaria, moitas veces difíciles de identificar precisamente pola súa cotián presenza. Tras a súa presentación, o vídeo será difundido a través das distintas canles institucionais da Deputación.

Unha campaña para “enfocar” a violencia que non sempre se ve

A campaña “O machismo vese claro cando enfocas. E ti, velo?” invita a poñer unhas lentes con perspectiva feminista para identificar actitudes, comentarios e prácticas que forman parte da estrutura da violencia de xénero. Baixo este lema, a Deputación promoveu ao longo destas semanas unha programación ampla e diversa.

Actividades arredor do 25N

Entre as accións desenvolvidas pola institución provincial destacan:

• Concurso escolar dirixido a centros educativos.

• Realización dun mural alusivo ao 25N.

• Obradoiros formativos en distintos municipios.

• Actividades de divulgación, como a celebrada esta semana no Porriño e a prevista para este luns na sede de Vigo dentro do programa Aquí faltan páxinas.

• Presentación dos resultados do estudo “Mulleres e Publicidade en Pontevedra”, realizado no marco da Cátedra de Feminismos 4.0 da Deputación e a Universidade de Vigo.

Co conxunto destas accións, a Deputación de Pontevedra reafirma o seu compromiso coa sensibilización social, a prevención e a visibilización da violencia machista, incidindo na necesidade dunha mirada crítica e consciente fronte ás desigualdades e agresións que sofren as mulleres.