Valença e Tui acollen esta fin de semana o XXII Torneio Internacional de Minibasket con máis de 600 participantes

A Eurocidade Valença-Tui converterase esta fin de semana, do 28 ao 30 de marzo, no epicentro do minibasket peninsular coa celebración do XXII Torneio Internacional de Minibasket, que reunirá a máis de 600 atletas pertencentes a 47 equipos de Portugal e España.

O Pavillón Municipal de Valença será o escenario principal dunha competición que abrangue as categorías mini 8, mini 10 e mini 12, consolidándose como unha oportunidade única para que os máis novos vivan unha experiencia deportiva internacional e compartan pista con equipos de ambos lados da fronteira.

Nesta edición participarán algunhas das formacións máis representativas da Península Ibérica, incluíndo equipos que non fallaron en ningunha convocatoria, como o Basket Clube de Valença —entidade organizadora—, os portugueses do Olivais ou os españois de O Barco.

Tras o éxito da pasada edición, que superou os 500 participantes, o torneo medra este ano en número e proxección, reafirmándose como unha das grandes referencias do calendario deportivo da Eurocidade.

Ademais da competición, o programa inclúe múltiples actividades paralelas, convivencias e experiencias dirixidas aos participantes, co obxectivo de fomentar os valores do deporte, a convivencia e o intercambio cultural entre os máis novos.

O evento está organizado polo Basket Clube de Valença en colaboración coa Câmara Municipal de Valença e o Concello de Tui, no marco do programa deportivo da Eurocidade, reforzando así os lazos deportivos e sociais entre ambas localidades.